सुदूरपश्चिम प्रदेशके कथा समेटल म्युजिक भिडियो ‘भुल्नै गाह्रो भो…’
पहुरा समाचारदाता
धनगढी, २२ अगहन । सुदूरपश्चिम प्रदेशके कथा बस्तुहे समेटके बनाइल म्युजिक भिडियो ‘भुल्नै गाह्रो भो…’ सार्वजनिक करल बा ।
सुदूरपश्चिम प्रदेशके मुख्यमन्त्री कमलबहादुर शाह धनगढीमे एक कार्यक्रमके बिच उक्त म्युजिक भिडियो सार्वजनिक करल हुइट । एभरेष्ट ग्यालरी टिमसे सुदूरपश्चिम प्रदेशके कैलारी गाउँपालिका तथा डोटी जोरायल गाउँ पालिका क्षेत्रमे छायाँकन करल डुइठो म्युजिक मुख्यमन्त्री शाह सार्वजनिक करल हुइट ।
म्युजिक भिडियोमे सुदूरपश्चिम प्रदेशके समसामयिक कथाहे अत्यन्तै सुन्दर तरिकासे प्रस्तुत करल बा । सनम कठायत ओ पवित्रा शाखीके उत्कृष्ट भूमिका रहल उ म्युजिक भिडियोमे जोरायल गाउँपालिकाके अध्यक्ष स्वयं दुर्गा ओझा लगायत ढेर कलाकारहुक्रनके अभिनय रहल बा ।
जोरायल गाउँपालिका ओ छिमेकी राष्ट्र भारतमे छायाँकन करल उ म्युजिक भिडियोमे दिपक गिरीके छायाँकन, अमृत चापागाईंके सम्पादन साथे जनक सिंहके निर्देशन रहल बा । मोडल स्वयं कठायतके कथा रहल उ म्युजिक भिडियो विशाल सुनारके प्रस्तुति करल बा कलेसे गायक उमेश मुस्कान ओ गायिका अनु चौधरीके स्वर रहल बा ।
उहे अवसमे इहे बरससे एभरेष्ट प्रादेशिक सम्मान घोषण करल रहे । उ क्रममे सुदूरपश्चिम प्रदेशमे सकृय रहीके पेशागत योगदान पुगैना सफल एभरेष्ट साहित्य सम्मानसे निर्मलकुमार भण्डारी, एभरेष्ट पर्यटन प्रवर्द्धन सम्मानसे खप्तडछान्ना गाउँ पालिका अध्यक्ष उत्तम रोकाया, एभरेष्ट देउडा रत्न सम्मानसे गायक भुवनप्रसाद दाहाल, एभरेष्ट पर्यटन सम्वर्द्धन सम्मानसे मायाप्रकाश भट्ट, पत्रकारिता सम्मानसे चित्राङ थापा, युवा समाजसेवी÷उद्यमी सम्मानसे किरण मल्ल, शिक्षा तथा समाजसेवी सम्मानसे योगेन्द्र हमाल, कृषि उद्यमी सम्मानसे खड्क मल्ल साथे युवा पर्यटन प्रचारप्रसार सम्मानसे भरतविक्रम शाहहे सम्मानित करल बा ।
कार्यक्रम सुदूरपश्चिम प्रदेश प्रज्ञा प्रतिष्ठानके उपकुलपति डा. टि एन जोशीके अध्यक्षतामे हुइल रहे । कार्यक्रममे प्रतिनिधि सभा सदस्य तारा लामा तामाङ, सामाजिक विकासमन्त्री मेघराज खड्का, आन्तरिक मामिलामन्त्री हिरा सार्की तथा उद्योग, पर्यटन, वन तथा वातावरण मन्त्री लक्ष्मणकिशोर चौधरी, प्रदेश सभा सदस्य शिवसिंह ओली, जोरायल गाउँपालिका अध्यक्ष दुर्गा ओझा, कैलारी गाउँ पालिका अध्यक्ष राजसमझ चौधरी, टमान सुरक्षा निकाय प्रतिनिधि, सहायक प्रमुख जिल्ला अधिकारी लगायत सुदूरपश्चिम प्रदेशके टमान क्षेत्रके प्रभावशाली व्यक्तित्वहुक्रनके विशेष उपस्थिति रहल रहे ।
Bhulnai Gahro Bho – Umesh Muskan – Annu Chaudhary – Sanam Kathayatt – Pabitra Shanki New Nepali Song
