कैलारी–७ मे ज्ञानविज्ञान धार्मिक महा–महोत्सव सुरु
पहुरा समाचारदाता
हसुलिया, २८ अगहन । कैलालीके कैलारी गाउँपालिका वडा नम्बर ७ रामपुरमे ज्ञानविज्ञान धार्मिक महा–महोत्सव २०८१ सुरु हुइल बा ।
महोत्सवके उदघाटन कैलारी गाउँपालिकाके प्रमुख राजसमझ चौधरी करल रहिट । कार्यक्रममे सम्बोधन करटी समाजहे गलत डगरसे जैना रोकेक लाग धार्मिक महोत्सव आवश्यक रहल बटैलै । उहाँ कहलै, ‘समाजमे संस्कार हेराइटा, यूवा पिढी कुलट ओर फस्टे उहीहे रोकेक लाग धार्मिक संगे ज्ञानगुनके बाट सिखाई पर्ना जरुरी बा ।’
ज्ञानविज्ञान धार्मिक महा–महोत्सवमे विशिस्ट पहुना कैलारी गाउँपालिकाके नेपाली काँग्रेस पार्टी सभापति कृष्ण चौधरी, वडा नम्बर ४ के वडाध्यक्ष ठागुराम चौधरी, कैलारी गाउँपालिका वडा नम्बर ७ वडाध्यक्ष तथा गाउँपालिका प्रवक्ता दिपेन्द्र बम, महाधिवेशन प्रतिनिधि मनिराम चौधरी तथा राजु बराल लगायत उपस्थिति रहे ।
उ महोत्सव २०८१ अगहन २८ गतेसे पुस ४ गते सम लग्ना हुइल बा । भक्तजनहुकनके लाग भुमिदान, अन्नदान, गौ दान, पृतृदान, तुलादान करे मिल्न आयोजक बटैले बा । ज्ञानविज्ञान धार्मिक महा–महोत्सव बिहान दैनिक ५ बजेसे ७ बजे सम योग विज्ञान शिबिर हुइना, साँझ ८ बजेसे १० बजेसम वृहत भजन कृतन ओ दिब्य झाँकी प्रदर्शन कैना जनागिल बा ।
