सयपत्री सावउसके दशौं वार्षिक साधारण सभा
पहुरा समाचारदाता
भजनी, १ पुस । कैलाली जिल्लाके भजनी नगरपालिका–९, अम्बारीस्थित सयपत्री सामुदायिक वन उपभोक्ता समूहके दशौं वार्षिक साधारण सभा तथा सार्वजनिक सुनुवाई कार्यक्रम हुइल बा ।
समूहके अध्यक्ष पदम चौधरीके अध्यक्षतामे हुइल कार्यक्रममे बसन्ता संरक्षित वन परिषदके सचिव विरबहादुर हमाल बर्का पहुना रहल रहिट । कार्यक्रममे उहाँ सामुदायिक वनके लगानी सामाजिक क्षेत्रमे लगानी करल ओरसे खुशी व्यक्त करलै ।
पचमुरिया सव डिभिजन वन कार्यालयके जमदार यी सामुदायिक वन विधान अनुसार काम करल बटैलै ।
सिएसीसी भजनीके अध्यक्ष खोजराम चौधरी सामुदायिक वनसे सुशासन ओ पारदर्शितामे ध्यान डेहे पर्ना बटैलै । हरियाली पार्वती सामुदायिक वनके अध्यक्ष राहुल बुढा छिमेकी सामुदायिक वनसे बचल कठुवा, काठी डेहे सहयोग करे पर्ना बटैलै ।
वार्षिक साधारण सभामे आर्थिक अवस्था कम्जोर रहल बालबालिकाहुकनहे झोला, स्टेशनरी, वन हेरालुहुनके ड्रेस ओ पहुनाहुकनहे चदरी ओह्राके सम्मान करल बा । वनके आयव्यय आन्तरिक लेखा समिति संयोजक शिवबहादुर विक करल रहिट । मनोरञ्जन सुरधिन चौधरी, प्रियका चौधरी ओ मनिराम चौधरी करल रहिट । संचालन पत्रकार धर्मेन्द्र विष्ट करल रहिट ।
