स्थानीय अगुवा महिलाहुकनसंग योजना सम्बन्धी कार्यशाला गोष्ठी
पहुरा समाचारदाता
धनगढी, २ पुस । स्थानीय अगुवा महिलाहुकनसंग योजना सम्बन्धी कार्यशाला गोष्ठी सोम्मारके रोज हसुलियामे हुइल बा ।
‘सामाजिक सदभावका लागि नागरिक सहभागिता कार्यक्रम’ अन्र्तगत कुर्वे विस्ट्रोके आर्थिक सहयोगमे मानव अधिकारका लागि महिला एकल महिला समुह सुदूरपश्चिम प्रदेशके आयोजनामे कार्यक्रममे दिगोपनाके लाग स्थानीय अगुवा महिलाहुकनसंग योजना सम्बन्धी कार्यशाला कैगिल हो ।
डब्लुएचआरसे संचालन करल ‘सामाजिक सदभावका लागि नागरिक सहभागिता कार्यक्रम’के प्रभावकारिता ओ परियोजना नैरहलेसे स्थानीय अगुवा महिला कैसिक बह्रनाबारे समुहगत छलफल ओ अन्तरक्रिया कैगिल बा । कार्यक्रममे सहजीकरण गोामा आचार्य, मानव अधिकारका लागि महिला एकल महिला समुह सुदूरपश्चिम प्रदेश अध्यक्ष सुमन शर्मा ओ परियोजना संयोजक वेद अवस्थी करल रहिट ।
समुहगत छलफलमे निष्क्रिया समुहहे सक्रिय बनैना,समुह दर्ता कैना, स्थानीयहतमे समन्वय करके आघे बह्रना, क्षमता विकासके लाग तालिमके माग कैना, सीपमुलक तालिम माग कैना कहल रहे ।
समुहहे दिगो बनाइक लाग आवश्यकताके आधारमे समुह दर्ता करके सशक्त बनैना, स्थानीय तहसे बजेट माग कैना, महिला हिंसा विरुद्धके अभियानहे आघे बह्रैना, स्थानीय अगुवा महिलाके लाग साइकल माग कैना कहल रहे ।
ओस्टेक करके ‘सामाजिक सदभावका लागि नागरिक सहभागिता कार्यक्रम’ अन्र्तगत कुर्वे विस्ट्रोके आर्थिक सहयोगमे मानव अधिकारका लागि महिला एकल महिला समुह सुदूरपश्चिम प्रदेशके आयोजनामे तनाव व्यवस्थापन तथा सकारात्मक सोच सम्बन्धी छलफल कार्यक्रम कैगिल बा । कार्यक्रममे प्रशिक्षण तथा सहजीकरण गोमा आचार्य करल रहिट । तनाव व्यवस्थापन ओ सकारात्मक सोच हुइलेसे केल मानवमे शान्ति हुइना उहाँ बटैली । घर परिवार, समाजमे तनाव हुइलेसे कोइफे सुखके बैठे नैसेक्ना उहाँ बटैली ।
