नवजीवन सेवा संघसे आयोजित परियोजनाके सल्लाहकार समिति बैठक निम्जल

पहुरा समाचारदाता
हसुलिया, २ पुस । नवजीवन सेवा संघसे परियोजना मार्फत कैलारी गाउँपालिकामे सञ्चालित गतिविधिके सल्लाहकार समिति बैठक निम्जल बा ।

मंगरके रोज कैलारी गाउँपालिका अध्यक्ष राजसमझ चौधरीके अध्यक्षता तथा गाउँपालिका उपाध्यक्ष भगवतीकुमारी चौधरीके विशिष्ट आतिथ्यतामे परियोजना सल्लाहार बैठक हुइल हो । कार्यक्रममे नवजीवन सेवा संघके कार्यक्रम व्यवस्थापक एकिन्द्र ठकुल्ला सन २०२४ सालमे कैगिल गतिविधिबारे जानकारी डेहल रहिट ।

संघसे वडा नम्बर ६ के बेनौलीमे कृषक समुहहे छेगरी पालन तालिम डेहल बा । राष्ट्रिय मावि विचैपुरमे स्वास्थ्य शिविर संचालन, कैलारी गाउँपालिकाके सक्कु विद्यालयके शिक्षकहुकनहे विषयगत तथा आन्तरिक मुल्यांकन तालिम, विद्यालय व्यवस्थापन समिति, शिक्षक अभिभावक संघहे तालिम प्रदान करल बा ।

शिक्षक तथा यूवा समुहहे आधारभूत कम्प्युटर हार्डवेयर तालिम, कैलारी गाउँपालिका सक्कु १८ ठो विद्यालयमे अभिभावक शिक्षा कार्यक्रम संचालन,गाउँपालिकाके विद्यालयके विद्यार्थी तथा शिक्षकहुकनहे वातावरण ओ डिआरआर सम्बन्धी तालिम, गाउँपालिका ओ सहास नेपालसे मिल्के वृहत वृक्षरोपण कार्यक्रम तथा ट्रि निर्माण करल जनागिल बा ।

ओस्टेक कैलारी गाउँपालिकाके सहकार्यमे पोषण कार्यक्रममे सहकार्य, गाउँपालिकासंग मिल्के आमा समुह, वाल क्लव तथा यूवा क्लवहे तालिम संचालन जनागिल बा । विद्यालयमे भर्ना अभियान संचालन, वडा नम्बर २ मे १९ ठो परिवारहे (अपाङगता रहल तथा एकल परिवार ओ विपन्न परिवारहे लक्षित करके विउ पुँजी कार्यक्रम अन्र्तगत छेगरी बच्चा डेहल बा ।

ओस्टेक कैलारी गाउँपालिकाके आमा समुहहे ऋण तथा बचत तालिम, ४ ठो विद्यालयमे काउन्सिलिङ विद्यार्थीनहे तालिम परियोजना अन्र्तगत संचालित गतिविधिके अनुगमन करल बा ।

ओस्टेक संघसे भौतिक सुधार अन्र्तगत २ विद्यालयमे ५ ठो कक्षा कोठा मर्मत, साथे ¥याम्पसहितके बराण्डाकेफे मर्मत सुधार करल बा । एक ठो विद्यालयमे हात धुइना धारा ओ खानेपानीके व्यवस्थापन करल व्यवस्थापक ठकुल्ला बटैलै । कार्यक्रममे गाउँपालिका अध्यक्ष राजसमझ चौधरी नवजीवन सेवा संघसे यी स्थानीय तहके ढेर काम करल बटैलै ।

गाउँपालिका उपाध्यक्ष भगवतीकुमारी चौधरी कोचिङ कक्षामे विद्यार्थीके सहभागिता कम रहल ओरसे कारण पत्ता लगाके अभिभावकहुकनहे सचेतना बनाई पर्ना सुझाव डेली ।

वडा नम्बर ६ के वडा अध्यक्ष प्रेमबहादुर चौधरी परियोजना लागु हुइना आघे ओ अब्बेक कैसिक अवस्था बा ओकर मुल्यांकन करेपर्ना जरुरी रहल बटैलै ।

सामाजिक विकास शाखा प्रमुख यगम कलेल विद्यालयमे कम्प्यूटर सहयोग करल मने ओकर सदुपयोग नैहुइल बटैलै । उहीहे आवश्यकताके आधारमे वितरण करेपर्ना सुझाव डेलै । कार्यक्रममे सक्कु वडाके अध्यक्षहुक्रे, प्रमुख प्रशासकीय अधिकृत खगेन्द्रराज जोशी, सामाजिक विकास शाखा प्रमुख यगम कलेल, टमान शाखाके प्रमुख, नवजीवन सेवा संघके फिल्ड संयोजक प्रमिन्द्र श्रेष्ठलगायतके सहभागिता रहे ।