कैलारी–८ मे लेहंगा सिल्ना तालिम सुरु

पहुरा समाचारदाता
कैलाली, ४ पुस । कैलालीके कैलारी गाउँपालिका वडा नम्बर ८ मे लेंहगा सिल्ना तालिम सुरु हुइल बा ।
व्यावसायिक तथा सीप विकास तालिम केन्द्र धनगढी कैलाली ओ कैलारी गाउँपालिका वडा नम्बर ८ के कार्यालयके सहकार्यमे ४५ दिने लेंहंगा सिल्ना तालिमके सुरु हुइल हो ।

उ तालिमके उदघाटन कैलारी गाउँपालिका उपाध्यक्ष भगवतीकुमारी चौधरी करल रहिट । तालिम उदघाटन कार्यक्रममे सम्बोधन करटी थारु समुदायके पहिरन लेहंगाके लोकप्रियता बह्रटी ओ यूवा पुस्ताके परम्परागत सीप विस्रैटी गैल ओरसे यी तालिम महत्वपूर्ण रहल बटैली ।

उहाँ कहली, ‘थारु समुदायके महिलाहुक्रे घल्ना लेंगना लोप हुइटी गैल मने टरटिहुवार, भोजकाजके बेला घल्ना करल बा । गैरथारु समुदायमे यकर आर्कषण बह्रल ओरसे सिल्के व्यावसायिक रुपमे बेचे सेक्लेसे एक ओर संस्कृति पहिचानके सरक्षण ओ दुसर ओर आम्दानीके स्रोत बह्राई सेक्जाई ।’

संस्कृति संरक्षणके लाग गाउँपालिकाके टमान वडामे यैसिन मेरके तालिम आयोजना करटी आइल गाउँपालिका उपाध्यक्ष बटैली ।

तालिम उदघाटन कार्यक्रममे वडा अध्यक्ष तारामल कठरिया, वडा सदस्य विजय चौधरी, वडा सचिव तुल्सी प्रसाद चौधरीलगायतके सहभागिता रहे ।