थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

परिवारीक संवाद कार्यक्रमसे कौशिलाके परिवारमे खुशीयाली

पहुरा | १२ पुष २०८१, शुक्रबार
परिवारीक संवाद कार्यक्रमसे कौशिलाके परिवारमे खुशीयाली

पहुरा समाचारदाता
धनगढी, ११ पुस ।
जौन गाउँठाउँ, घरपरिवार, समाजमे कलह, अशान्ति रहठ, उ ठाउँमे कबु विकास नैहुइठ । कैलारी गाउँपालिका वडा नम्बर ३ खोनपुरके कौशिला चौधरीके परिवारमे गोसिया–गोसिनीय विच सदैवहस विवाद हुके घरेक आर्थिक अवस्था कम्जोर बन्टी गैल रहे कलेसे ओकर असर लर्कनमे समेट परे लागल रहे ।

उहाँक गोसिया रामसिंह चौधरी पहिले जाँरडारु पिना करिट । जिहीसे घरपरिवारमे सदाहस विवाद होए । ओकरसंगे घरछिमेकमेफे बादविवाद हुके सम्बन्ध विगरटी गैल रहे ।

रामसिंह चौधरी कहठै, ‘पहिले जाँरडारु पियँु टे कोईफे मजासे नैबोलिट, नैमजा दृष्टिसे हेरिट, डेखके भग्ना करिट । घरपरिवार, छरछिमेकमे सम्बन्ध विगरटी गैल रहे । मोर गोसिनीया सम्झैली, बुझैली, ओकरपाछे मादक पदार्थ सेवन कैना छोरनु, सिखाइल बाटहे कार्यान्वयनमे ल्यान्नु, एकाएक अब्बे घर परिवारमे खुशीयाली छाइल बा ।’

मर्सिकोर नेपाल ओ सृजनशिल समाजको सृजना (सिसिएस) के साझेदारीमे सञ्चालित आर्थिक विकास मार्फत जोखिम व्यवस्थापन परियोजना (एमरेड) अन्र्तगत कैलारी गाउँपालिकाके टमान वडामे नौ जोरीहुकनके लाग परिवारीक संवाद(जोरी कक्षा) कार्यक्रम संचालन कैगिल रहे ।

परिवारीक संवाद कक्षामे कौशिलाफे सहभागी हुइना मौका पैली । कौशिला आपन सिखल बाट अपन परिवारमे लागु कैली, गोसियाहे सिखैली, बुझैली । जिहीसे उहाँक परिवारमे खुशीके तरङ छाइल बा ।

कौशिला कहठी, ‘गोसिया पहिले जाँरडारु खाइट पिईट । जटरा कमाइट सक्कु पिनामे खर्च कैडाँरिट । रहल पैसाफे जाँरडारुमे खर्च हुई लागलपाछे घरपरिवारमे आर्थिक समस्या होए । झैझगरा होए, ओकर असर, लर्का, छरछिमेकमेफे डेखा परे । एमरेड परियोजनासे संचालन करल परिवारीक संवाद(जोरी कक्षा) मै लेहे पैनु, महीहे बहुट फाइदा हुइल । सिखल ज्ञान घरपरिवारमे लागु कैनु मोर जीवनमे खुशयाली ल्यानल ।’

उहाँ कहली, ‘गोसिया जाँरडारु छोरलपाछे कमाइल रुप्या व्यवस्थापन कैना ओ बाँचल रुप्या बचतफे करटी रहल बटी । पहिले घरेक आर्थिक अवस्था कम्जोर हुके खैना लगैनाफे समस्या रहे । अब्बे कुछ समस्या नैहो । घरेक आर्थिक अवस्थामे सुधार आइलपाछे लर्काफे बोडिङ स्कुलमे पह्राई लागल बटी ।’

रामसिंह ओ गोसिनीया कौशिला घरपरिवारके काममे एकदुसरहे सघैना कैठै, जिहीसे डुनु जानेक कामके कार्यभारफे घटल बा । एक ठो कहावत बा गोसिया गोसिनीय एक रथ दुई चक्का हुइट । रथके एक चक्का कम्जोर हुइलेसे, टुटगैलेसे मजासे नेंगे नैसेकठ । उ जोरीके जीवनमे मेलमिलाप हुइलपाछे घरपरिवार मजासे चले लागल छिमेकी पार्वती चौधरी बटैली ।

उहाँ कहली, ‘पहिले रामसिंह खैना पिना करिट । घरपरिवारमे झगरा हुइन । घरपरिवारके कलह डेखके लर्काफे रिसहा हुगैल रहिन । जब कौसिला जोरी कक्षा लेके अपन गोसियाहे सुधर्ना सफल हुइली । अब्बे कौशिला नैरहल बेला रामसिंह घरेक सक्कु काम कैना करठै । दुनु जाने घर रहलबेला मिलजुलके काम करेबेर कार्यभारफे घटल बाटिन ।’

सिसिएसके सामाजिक परिचालक मीना चौधरी परवारिक संवाद तालिममे नौ ठो जोरीहे सहभागी कराके कक्षा संचालन करल बटैली । उहाँ कहली, ‘लैङिक हिंसा, समावेशी, महिला पुरुष मिल्के काम करेबेर कार्यभर घटाई सेक्ना बाट लगायत ढेर बाट सिखागैल रहे । एमरेड परियोजनासे ६ लाख रुप्या बजेटमे पारिवारिक संवाद, महिलाहुकनके क्षमता अभिवृद्धि, आर्थिक स्रोत मजा बनाइक लाग विपद जोखिम परिवारहे सिचाईके लाग वडा नम्बर ७ मे पाँच ठो विद्युतिय मोटर ओ बगरखेतीमे सहयोग करल बटैली ।

ओस्टेक करके मर्सिकोर नेपालके एमरेड परियोजनाके वरिष्ठ जेसी अधिकृत संगिता अधिकारी परिवारिक संवाद कक्षामे वित्तीय सरक्षरताके विषय बस्तु सिखाइलपाछे उहाँहुक्रे कमाइल पैसाके व्यवस्थापनके साथे बचत करे सिखल बटैली । उहाँ कैलारी गाउँपालिकाके वडा–३ ओ ७ मे विपद जोखिम न्यूनिकरणबारे जानकारी, सचेतनामूलक कार्यक्रमफे संचालन करल बटैली । ओस्टेक करके विपदके जोखिममे रहल समुदायके आर्थिक स्रोतमे वृद्धि करेक लाग बनुवामे खेरा जैटी रहल सखुवक पटियासे डोना टपरी बनैना मेसिन सपोट करल, गन्नाके जुस बनैना मेसिन सपोट करल बटैली ।

कैलारी गाउँपालिकाके अध्यक्ष राजसमझ चौधरी अब्बे ढेर जैसिन घरपरिवारमे कलह बह्रटी रहल ओरसे एमरेड परियोजनासे संचालन करल परिवारिक संवाद कार्यक्रम प्रभावकारी रहल बटैलै । उहाँ कहलै, यी परियोजनासे गतिविधि छोट लगानीमे कलह रहल ढेर परिवारमे खुशीयाली ल्यानल बा ।

ओस्टेकल करके कैलारी गाउँपालिकाके उपाध्यक्ष भगवतीकुमारी चौधरी भौतिक विकासहे केल विकास हो कना आम मानसिक रहल बटैली । अब्बे समाज घरपरिवारमे कलहके कारण संस्कार संस्कृति परम्परा हेरैटी गैल बटैली । घरपरिवारमे कलह सृजना हुइल कारण लैङिक ंिहसाफे बह्रल बटैली ।

मर्सिकोर नेपाल ओ सृजनशिल समाजको सृजना (सिसिएस) के साझेदारीमे सञ्चालित आर्थिक विकास मार्फत जोखिम व्यवस्थापन परियोजना (एमरेड) अन्र्तगत कैलारी गाउँपालिकाके टमान वडामे नौ जोरीहुकनके लाग परिवारीक संवाद(जोरी कक्षा) कार्यक्रम संचालनसे लैङिक हिंसा न्यूनिकरणमे सहयोग पुगल उहाँ बटैली ।

जनाअवजको टिप्पणीहरू