गैर परम्परागत क्षेत्रमे महिला उद्यमशिलता विकास परियोजनाके सामाजिक लेखा परिक्षण हुइल

पहुरा समाचारदाता
धनगढी, १२ पुस । ‘गैर परम्परागत क्षेत्रमा महिला उद्यमशिलता विकास परियोजना’के सामाजिक लेखा परिक्षण हुइल बा ।
एफसिए, वुमन बैंक, धनगढी उपमहानपालिकाके सहयोगमे मुक्त कमैया महिला विकास मञ्चसे सञ्चालित ‘गैर परम्परागत क्षेत्रमा महिला उद्यमशिलता विकास परियोजना’ के सामाजिक लेखा परिक्षण हुइल हो ।
उ परियोजनाके अधिकृत पदमराज जोशी सन २०२४ के जुलाईसे डिसेम्बरसम सञ्चालन कैगिल गतिविधिबारे प्रस्तुतीकरण करल रहिट ।
६ महिनाके अवधिमे बजार मुल्याङकन ओ गैर परम्परागत क्षेत्रके लाग नीजि क्षेत्रके सम्भाव्यता अध्ययन कैना, गैर परम्परागत उद्यमम लगानी कैना विद्यामन प्रमुख कम्पनीहे प्रोत्साहन कैना, नगरपालिकास्तर उद्यमशिलता केन्द्र स्थापनाके लाग अन्तरक्रिया, नगरपालिकास्तरमे उद्यमशिलता केन्द्र संचालनके ढाँचा विकास कैना, सम्मावित उद्यमीके पहिचान ओ छनौट, उद्यमशिलता विकासमे अभिमुखीकरण, सहकारीमे मुल्याङकन ओ अवस्था विश्लेषण कैगिल रहे ।
परियोजना अन्र्तगत गैर परम्परागत क्षेत्रमे सीप विकास तालिम, व्यावसाय स्थापनाके लाग सहयोग, परियोजनाके कर्मचारीनहे लैङिक संवेदनशिलतामे प्रशिक्षक प्रशिक्षण तालिम, समुदायिक जागरण अभियान संचालन, परियोजना अभिमुखीकरण, वेव लाइन सर्वे, कर्मचारी अभिमुखीकरण कार्यक्रम, एलपेक बैठक, सामाजिक लेखा परिक्षण कैगिल बा ।

ओस्टेक स्थानीय सरकारसे संयुक्त रुपमे कार्यक्रम अनुगमन, मासिक रुपमे कर्मचारी बैठक, परियोजनाके बार्षिक बैठक, साझेदार संस्थासे समिक्षा, त्रैमासिक रुपमे कार्यसमितिसे कार्यक्रम अनुगमन, सिआरएम अभिमुखीकरण कैगिल परियोजना अधिकृत जोशी बटैलै । कार्यक्रमके लाग जम्मा बजेट २० लाख ५९ हजार २४१ रुप्या रहलमे ९ लाख ५ हजार ५७७ रुप्या खर्च हुइल उहाँ जनैलै ।
परियोजना अधिकृत जोशी पाँच जाने व्यक्तिहुकनहे उद्यम स्थापनाके लाग रु ४० हजारसे ६० हजार सम्म सहायता प्रदान करल बटैलै । पाँच जाने व्यक्तिहुकनहे टमान मेरके तालिम प्रदान करल बटैलै ।

धनगढी उपमहानगरपालिका वडा नम्बर १० के अशोक राना परियोजना मार्फत सहयोग पाइल ओ मोवाइल मर्मत केन्द्र संचालन करल बटैलै । उहाँ तालिम संगे मोवाइल मर्मत कैना औजार खरिदके लाग सहयोग पाइल बटैलै ।
उहाँ कहलै, ‘मै एक ठो अपाङगता रहल व्यक्ति हुँ । अपाङता भत्ता पाके मोवाइल मर्मत केन्द्र खोल्नु यी संस्थासे तालिम ओ औजार किन्न सहयोग पैनु । उहीसे मोर व्यवसायमे और मजा सहयोग हुइल बा ।’
धनगढी उपमहानगरपालिका–१७ पठरीके करुणा राना परियोजनासे पाइल तालिम ओ आर्थिक सहयोगसे होटल व्यवसायहे विस्तार कैना सहयोग हुइल बटैली । उहाँ कहली, ‘पहिल मोर होटल छोट साकिर रहे । संस्थासे तालिम ओ आर्थिक सहयोग पाके विस्तार करले बटु । पहिलेकसे अब्बे मजा हुइल बा ।’

धनगढी उपमहानगरपालिका–१७ भागीराम चौधरी संस्थासे आर्थिक सहयोग पाके गारमेन्ट व्यवसाय संचालन करल बटैलै । धनगढी उपमहानगरपालिका–१७ धुरझन्नाके गरिबलाल चौधरी उ संस्थासे सञ्चालित ‘गैर परम्परागत क्षेत्रमा महिला उद्यमशिलता विकास परियोजना’ मार्फत तालिम ओ आर्थिक पाके हेयर कटिङ खोलल बटैलै । कलेसे धनगढी उपमहानगरपालिका–८ के मोहित चौधरी हाली आल्मुनियमे व्यवसाय संचालन करे जैटी रहल बटैलै ।
उहाँ कहलै, ‘अब्बे दुसर जानेक ठेन काम करठु । हाली अपन आल्मुनियम व्यवसाय संचालन करम ।’
कार्यक्रममे मुक्त कमैया महिला विकास मञ्चके संस्थापक अध्यक्ष कौशिला चौधरी यी परियोजना गैर परम्परागत क्षेत्रमे महिला उद्यमशिलता विकास करेक लाग ल्यानल मने ओहोर ओर चासो नैडेखल बटैली । धनगढी उपमहानगरपालिकासे साझेदारी करके कैगिल कार्यक्रममे महिलाहुकन ढेर प्राथमिकता डेहे खोजल बटैली ।
फाया नेपालके अध्यक्ष गोमा आचार्य मनैनहे नयाँ नयाँ व्यापार कैना बाट पत्ता नैहुइल बटैली । उहाँ कहली, ‘थारु समुदायमे पुन्जा ओ गोन्डसे बनैना सामाग्रीके ढेर माग रहल ओरसे ओहोर ओर ध्यान जैना जरुरी बा ।
मुक्तकमैया महिला विकास मञ्चके कार्यक्रम संयोजक इन्द्रजीत चौधरी परियोजनासे विदेशी कच्चा प्रदार्थसेफे स्वदेशी कच्चा पदार्थके प्रयोग करके नयाँ नयाँ चिज बनैना ओर प्रोत्साहन करल बटैलै । उहाँ कहलै, ‘हम्रे कहले बटी । लौवा लौव आइडियासे लौवा चिज बनाई कार्यक्रम जैजाई ।’
गैर सरकारी संस्था महासंघ कैलालीके अध्यक्ष चेतमान साउद जौन व्यक्ती लौव आइडिया लेके उहीहे प्रवद्र्धन कैना जरुरी रहल बटैलै ।
सामाजिक लेखा परिक्षण हुइना आघे परियोजना मार्फत सञ्चालन कैगिल व्यवसायके स्थलगत अनुगमन कैगिल रहे । अनुगमन कार्यक्रममे संस्थाके अध्यक्ष सीमाकुमारी चौधरी, संस्थापक अध्यक्ष कौशिला चौधरी, मञ्चके कार्यक्रम संयोजक इन्द्रजीत चौधरी, उद्यम विकास अधिकृत प्रदीपकुमार चौधरी, गैर परम्परागत क्षेत्रमा महिला उद्यमशिलता विकास परियोजनाके अधिकृत पदमराज जोशी, धनगढी उपमहानगरपालिकाके नगर उपप्रमुख कन्दकला राना, प्रमुख प्रशासकीय अधिकृत नरेन्द्रसिंह खाती, प्रशासन शाखा प्रमुख सुरेन्द्र सिंह कार्की, सामाजिक विकास शाखा प्रमुख टंक बहादुर विष्ट, रोजगार शाखा प्रमुख चन्द्रबहादुर महरालगायत मुक्त कमैया महिला विकास मञ्चके प्रतिनिधिहुकनके सहभागिता रहे ।
धनगढी उपमहानगरपालिका ओ गोदावरी नगरपालिकाके सक्कु वडामे कार्यक्षेत्र रहल परियोजनाके अवधि २०२६ डिसेम्बरसम रहल बा ।
