अपाङगता रहल व्यक्तिनहे बाँसके मुढा बनैना तालिम

पहुरा समाचारदाता
धनगढी, १४ पुस । अपाङगता रहल व्यक्तिनहे १५ दिने बाँसके मुढा बनैना तालिम डेगिल बा ।
कैलारी गाउँपालिका महिला तथा बालबालिका शाखाके आयोजनामे ग ओ घ बर्गके अपाङगता रहल व्यक्तिनहे बाँसके मुढा बनैना तालिम डेगिल हो ।
अँटवारके रोज सम्पन्न हुइल तालिम समापन कार्यक्रम कैलारी गाउँपालिकाके उपाध्यक्ष भगवतीकुमारी चौधरीके वरका पहुनामे हुइल रहे । कार्यक्रममे सम्बोधन करटी उहाँ यी तालिमसे अपाङगता रहल व्यक्तिहुकनके आय स्रोत बह्राई सेक्ना बटैली । उहाँ कहली, ‘अपाङगता रहल व्यक्तिहुकनहे नोन्दुर काम कैना समस्या हुई सेकठ । मने मुढा बैठले बैठलेफे बनाई सेक्जाइठ । जटरा ढेर बनाई सेक्लेसे ओटरे ढेर आम्दानी करे सेक्जाई ।’

यी तालिममे महिलाहुकनके सहभागिता हुइल डेखके खुशी लागल उहाँ बटैली । अपाङगता रहल व्यक्तिहुकनके बनाइल सामाग्रीके बजारीकरण कैडेना गाउँपालिकासे सहजीकरण कैना उहाँ बटैली ।
तालिम समापन कार्यक्रममे कैलारी गाउँपालिका वडा नम्बर ३ वडा अध्यक्ष सन्तराम चौधरीलगायतके सहभागिता रहे । कार्यक्रमके संचालन कैलारी गाउँपालिका महिला तथा बालबालिका शाखाके प्रमुख बालकुमारी चौधरी करल रहिट ।

