शैक्षिक महोत्सव एक लाख ढेर जे करलै अवलोकन

पहुरा समाचारदाता
धनगढी, १६ पुस । पुस ९ गतेसे १५ गतेसम धनगढीमे हुइल नवौ राष्ट्रिय पुस्तक प्रदर्शनी तथा शैक्षिक महोत्सव २०८१ एक लाख ढेरजे अवलोकन करले बटै ।
१४ बर्षपाछे धनगढीमे हुइल शैक्षिक महोत्सव एक लाखसे ढेर जाने अवलोकन करल नेपाल पुस्तक तथा स्टेशनरी व्यवसायी संघ कैलालीके अध्यक्ष भीम पडाल जनैलै । सुदुरपश्चिम प्रदेश सरकारके पुर्वमन्त्री तथा सुदुरपश्चिम प्रदेश सभा सदस्य प्रकाशवहादुर देउवाके वरका पहुनामे हुइल समापन कार्यक्रममे उहाँ धनगढीमे करल राष्ट्रिय पुस्तक प्रदर्शनी तथा शैक्षिक महोत्सवसे शिक्षा क्षेत्रमे नयाँ आयाम ठप्ना बटैलै ।
महोत्सवसे शिक्षा क्षेत्रमे परिवर्तन ल्यन्ना महत्वपुर्ण टेवा पुगैना बटैलै । उहाँ शैक्षिक महोत्सवसे शिक्षा क्षेत्रहे सूचनामैत्री ओ समय सुहैटीक बनाइक लाग कोसेढुंगा साविक हुइल बटैलै । उहाँ शिक्षा क्षेत्रके विकासके लाग नयाँ व्यवस्था आवश्यक रहल दावी करलै । उहाँ कैलाली क्षेत्र नम्बर ५ के विकासके लाग अपने सदा लग्टी रहल ओ यी क्षेत्रके विकासके लाग प्रतिबद्ध रहल बटैलै ।
सामाजिक रुपान्तरणके लाग शिक्षामे नयाँ अभियान कना नाराके साथ हुइल नवौं वृहत राष्ट्रिय पुस्तक प्रदर्शनी तथा शैक्षिक महोत्सवमे सुदुरपश्चिम प्रदेशके साथे देश ओ विदेशमे रहल प्रकाशक, स्टेशनरी वितरक, शैक्षिक संस्था, मसलन्द सामाग्री, शिक्षण संस्था ओ शिक्षासंग सम्बन्धित निकायके करके एक सय ढेर स्टल रहे ।
विद्यालय स्तरीय प्रतियोगितामे दुई लाख ढेरके पुरस्कार वितरण
महोत्सव अवधि भरमे विद्यालय स्तरीय नृत्य, कविता, वक्तृत्वकला ओ चित्रकला प्रतियोगिता आयोजना कैगिल रहे । चार ठो प्रतियोगिताके करके टमान सात ठो विधामे विद्यालय स्तरीय प्रतियोगिता आयोजना करल रहे । ओम्ने झण्डै दुई लाख बीस हजार नगद पुरस्कार वितरण करल अध्यक्ष पडाल जनैलै ।
प्रत्येक विधामे पहिल हुइलहे नगद १५ हजार, दुसरा हुइलहे नगद दश हजार ओ टिसरा हुइलहे नगद पाँच हजारसहित सम्मान करल बा । विद्यालयस्तरीय नृत्य प्रतियोगितामे थ्रीस्टार बोर्डिङ स्कुल पहिल, बात्सल्य विद्या निकेतन दुसरा ओ ग्ली एकेडेमी टिसरा स्थान हुइल बा ।
चित्रकला प्रतियोगिता आधारभुत तह ओर शैलेश्वरी बोर्डिङ स्कुलके भावना चन्द प्रथम हुइली । हिमाल एकेडेमीके निरज ठकुल्ला दुसरा हुईबेर डिस्कभरी बोर्डिङ स्कुलके आयुषा खड्का टिसरा हुइली । चित्रकला प्रतियोगिता माध्यमिक तह ओर एक्सीस विद्याश्रमके निधि पाण्डेय पहिल हुइली । थ्रीस्टार बोर्डिङ स्कुलके रेखा ओझा दुसरा ओ डिस्कभरी बोर्डिङ स्कुलके निरज सिंह जागरी टिसरा हुइली ।
वक्तृत्वकला प्रतियोगिता आधारभुत तह ओर ऐश्वर्य विद्या निकेतनके साक्षी भट्ट पहिल हुइली । राईजिङ स्टार बोर्डिङ स्कुलके तृप्ती सिंह दुसरा ओ ग्यालेक्सी सेकेन्डरी स्कुलके वैभव बिष्ट टिसरा हुइलै । वक्तृत्वकला प्रतियोगिता माध्यमिक तह ओर फारवेष्ट बोर्डिङ स्कुलके प्रज्वल भट्ट पहिल हुइलै । वात्यल्य विद्या निकेतनके सान्त्वना पोखरेल दुसरा हुईबेर कुमुदिनी आदर्श विद्या निकेतनके नरेन्द्र आचार्य टिसरा हुइलै ।
कविता प्रतियोगिता आधारभुत तहओर माईलस्टोन बोर्डिङ स्कुलके शिशिर ओझा पहिल हुइलै । ग्ली एकेडेमीके आयुषा कटुवाल दुसरा हुईबेर मालाखेती भिजन स्कुलके दिक्षा जोशी टिसरा हुइली । कविता प्रतियोगिता माध्यमिक तह ओर एरिष्टो बोर्डिङ स्कुलके गौरव उपाध्याय पहिल हुइली कलेसे एक्सिस विद्याश्रमके करन सिंह धामी दुसरा हुइलै । एयाईन्स ईन्टरनेशनल स्कुलके दिनेश फराडा ओ चैतन्य पाठशालाके जेनी चौधरी संयुक्त रुपमे टिसरा हुइलै । सात ठो विधामे विजयी पहिल हुइलहे नगद १५ हजार, दुसराहे १० हजार ओ टिसराहे ५ हजार नगद सहित सम्मान करल बा ।
महोत्सवमे शैक्षिक बहस
महोत्सव अवधिभर दैनिक रुपमे शैक्षिक वहस आयोजना कैगिल बा । शिक्षा क्षेत्रसंग सम्बन्धित टमान गतिविधि आयोजना करल बा । टमान विषयवस्तुसंग रहिके सहजकर्ता टेकराज अवस्थी ओ दिर्घराज उपाध्यायसे सहजकर्ताके रुपमे बहस कार्यक्रम सञ्चालन करल रहिट ।
