थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

भादा थारु होमस्टे महोत्सव सुरु

पहुरा | १७ पुष २०८१, बुधबार
भादा थारु होमस्टे महोत्सव सुरु

कला, संस्कृति जर्गेना आवश्यकः मन्त्री चौधरी

पहुरा समाचारदाता
धनगढी, १७ पुस ।
कैलालीके धनगढी उपमहानगरपालिका–१६ स्थित भादा गाउँमे थारु होमस्टे महोत्सव सुरु हुइल बा ।

थारु होमस्टे गाउँ भादा पर्यटन विकास तथा व्यवस्थापन समितिके आयोजनामे थारु होमस्टे गाउँ भादाके प्रचारप्रसार एवम् प्रवद्र्धनके साथे थारु समुदायके कला, संस्कृति जर्गेना कैना उद्देश्यके साथ थारु होमस्टे महोत्सव सुरु हुइल हो । पुस १७ से २१ गतेसम हुइना महोत्सवके उदघाटन सुदूरपश्चिम प्रदेश सरकारके उद्योग, पर्यटन वन तथा वातावरण मन्त्रालयके माननीय मन्त्री लक्ष्मण किशोर चौधरी थारु परम्परागत अनुसार छाँकी ढरकाके करल रहिट ।

कार्यक्रममे सम्बोधन करटी उहाँ थारु समुदायके भेष, भुषा, कला, संस्कृति कैसिक बचाई सेक्जाईठ ओकर अपन नैतिक दायित्व अनुसार सहयोग कैना बटैलै ।

अइना आर्थिक बर्षमे होमस्टे ओ सांस्कृतिक प्रवद्र्धनके लाग बजेट छुटयाइना उहाँ बटैलै ।
लोक सेवा आयोगमे थारु समुदायके जनसंख्याके आधारमे प्रतिनिधित्व करैना अपने सक्कु क्षेत्रसे समन्वय करके आघे बह्रल मन्त्री चौधरी बटैलै ।

उहाँ प्रदेश सरकारसे होमस्टेके लाग छुटयाइल बजेट दर्ता नैहुइल ठाउँमे गैल बा कना बाट आइलमे आपन गम्भीर ध्यानाकर्षण हुइल जनैलै ।

हम्रे मन्त्री बन्नासे पहिले कर्मचारीके बदमासीके कारण बजेट गैल हो,’ उहाँ कहलै, ‘नियोजित ढंगसे सरकारी सम्पति दोहन कैना प्रवृति बा । उहीहे निरुत्साहित करके सही ठाउँमे कौन कौन ठाउँमे आवश्यक बा । उहाँ लगानी कैना आवश्यक बा ।’
कार्यक्रममे सुदूरपश्चिम प्रज्ञा प्रतिष्ठानके उपकुलपति डा. टिएन जोशी भादामे हुइना होमस्टेसे थारु समुदायके कला, संस्कृति संरक्षण ओ प्रवद्र्धनमे टेवा पुगल बटैलै । प्रतिष्ठानसे सुदूरपश्चिम प्रदेशमे रहल सक्कु समुदायके भाषा, कला, संस्कृति, परम्पराहे प्रवद्र्धन करेक लाग लागी परल बटैलै ।

कार्यक्रममे थारु कल्याणकारिणी सभा कैलालीके सभापति विरु चौधरी, निवर्तमान कार्यवाहक सभापति माधव चौधरी, थारु विद्यार्थी समाजके केन्द्रीय उपाध्यक्ष ठाकुर प्रसाद करियाप्रधान, निसर्ग अस्पताल प्रालिके अध्यक्ष तिर्थ पन्त लगायत मन्तव्य राखल रहिट ।

समितिके अध्यक्ष लक्ष्मीनारायण चौधरीके अध्यक्षतामे हुइल कार्यक्रममे उहाँ होमस्टेके प्रचारप्रसार तथा प्रवद्र्धनके साथ थारु समुदायके संस्कृति, खानपान, भेषभूषा, सीपकला, प्राकृतिक सम्पदाके सदुपयोग एवम् जगेर्ना कैना उद्देश्यसे हरेक वर्ष महोत्सव आयोजना करल जनैलै ।

कार्यक्रममे स्वागत मन्तव्य समितिके सचिव चेतराम चौधरी ओ संचालन गायक राजु चौधरी‘राज’ ओ सुनिता चौधरी करल रही । महोत्सव उदघाटन कार्यक्रममे थारु समुदायके कला, संस्कृति झल्कना टमान नाँचफे डेखागैल रहे ।

संरक्षणके लाग सक्कु जाने करी काम, संस्कृति भेष भुषा राखी हमार पहिचान कना मुल नाराके साथे आयोजना हुइल महोत्सवमे थारु खानपानके परिकार, थारु सीपकला तथा भेषभूषा, थारु देउथान अवलोकन, लहरुमे गाउँके अवलोकन, थारु संग्राहालयके अवलोकन, काठे पिङलगायत आकर्षणके रुपमे रहल बा ।

जनाअवजको टिप्पणीहरू