वसन्ता सिएफसिसिके १६औं वार्षिक साधारण सभा

पहुरा समाचारदाता
हसुलिया, २५ पुस । वसन्ता वन क्षेत्र सामुदायिक वन उपभोक्ता समुह समन्वय समिति सुर्मिनालाके १६औं वार्षिक साधारण सभा विफेक रोज सम्पन्न हुइल बा ।
कैलारी गाउँपालिका अध्यक्ष राजसमझ चौधरीके वरका पहुनामे हुइल कार्यक्रममे उहाँ सामुदायिक वनसे स्थानीय तहहे बुझाई १० प्रतिशत कर बुझैलेसे स्थानीय सरकारहेफे लगानी कैना सहजुल हुइना बटैलै ।
सामुदायिक वनसे कुल आम्दानीके १० प्रतिशत स्थानीय सरकारहे अनिवार्य बुझाई पर्ना नीतिमे रहल बा । टबमारे सरकारहे बल्गर बनाइक लाग कर तिर्न उहाँ आग्रह करलै ।
उहाँ कहलै, ‘भौतिक पूर्वाधारकहे केल विकास हुइल कना आम मनैनके मनस्थिति बा । उहीसे ढेर आवश्यक मानविय बा । हमार समाज, शैक्षिक अवस्था केहोर जाईटा मुल्यांकन कैना जरुरी बा । गाउँपालिकासे अब्बे शैक्षिक क्षेत्र सुधारके लाग लागल बा ।’ आर्थिक अवस्था कम्जोर हुके बहुट जैसिन विद्यार्थी १० कक्षासमफे पह्रे नैसेक्ना अवस्था बा,’ गाउँपालिका अध्यक्ष कहलै,‘हम्रे कक्षा १० पूर्ण रुपमे निशुल्क कराई लागल बाटी । अभिनफे कौनो ना कौनो बाहनामे शुल्क लेना करल डेखल बा । यम्ने निःशुल्क शिक्षाके लाग सक्कु जाने सहकार्य कैना जरुरी बा ।’
अब्बे जारके मौसम रहल ओरसे सामुदायिक वनसे ढलपरा, सरेलागल काठी निःशुल्क उपलब्ध करके सहयोग कैडेना आग्रह उहाँ करलै ।
गाउँपालिकासे किसानके मार्कहे बुझके आधा मालपोत घटाइल बटैलै । उहाँ कहलै, ‘कैलारी गाउँपालिकाके ढेर किसान बाढसे प्रभावित बटै । कलेसे छाडा चौपायासेफे पीडित बटै । किसानहे पिरमर्का बुझके हम्रे मालपोत कर आधा घटाइल हुई ।’
कैलारी गाउँपालिकामे थारु समुदायके ढेर बसोवास रहल बा । थारु समुदायमे सिकलसेल ढेर डेखा परल बा । उहीहे मध्ये नजरके गाउँपालिकासे निशुल्क रगतके व्यवस्था करले बा । कलेसे सिकलसेल चेकजाँचके लाग उदासीपुर प्राथमिक स्वास्थ्य केन्द्रमे निशुल्क चेकजाँचके व्यवस्था करल अध्यक्ष बटैलै । अब्बे भोज कैना सिजन आइल ओरसे कोई भोज करटा कलेसे पहिले सिकलसेल जाँच करके भोज कैना जरुरी रहल उहाँ बटैलै ।

वसन्ता वन क्षेत्र सामुदायिक वन उपभोक्ता समुह समन्वय समितिके अध्यक्ष रमेश चौधरी सामुदायिक वनके सक्कु जाने संरक्षणकर्मी रहल बटैलै । बनुवाहे हम्रहिन नैचाहिहिस मने बनुवा हम्रहिन चाही उहाँ कहलै, ‘अक्सिजन विना हम्रे बाँचेक नैसेक्ना जौन वनसे निःशुल्क रुपमे हम्रहिन प्रदान करठ । प्रकृति ओ पर्यावरण बचैना हमार जिम्मेवारी हो ।’

कार्यक्रममे सव डिभिजन वन कार्यालय वसन्ताके सुभम चौधरी कतिपय सामुदायिक वन नविकरण नैकरलेसे पर्यवरणसे फाइदा लेहे नैपैना बटैलै । उहाँ कहलै, ‘सिएफसिसि वसन्ता अन्र्तगत ५२ ठो सामुदायिक वन रहल ओरसे सक्कु जाने संरक्षणमे लागल बटैलै । कार्यक्रममे नमुना सामुदायिक वनके अध्यक्ष रन्जिता चौधरी पहिलेक तुल्नामे सामुदायिक वनके अवस्था कम्जोर बन्टी गैल बटैली । उहाँ सामुदायिक वनके पदाधिकारीहुकनहे टमान मेरिक तालिमके आवश्यकता रहल बटैली । कार्यक्रममे स्वागत मन्तव्य सिएफसिसि वसन्ताके सदस्य शान्ति चौधरी ओ संचालन लेखापाल सन्दीप चौधरी करल रहिट । ओस्टेक उहाँ आर्थिक प्रतिवेदनफे सुनैले रहिट ।

कार्यक्रममे विशिष्ट पहुना कैलारी गाउँपालिका वडा नम्बर ३ के वडा अध्यक्ष सन्तराम चौधरी, सिएफसिसिके पूर्व अध्यक्ष भरतराम चौधरी, उ सिएफसिसि अन्र्तगत टमान सामुदायिक वनके अध्यक्ष तथा पदाधिकारीहुकनके सहभागिता रहे ।
