थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

पहुरा कृषि सहकारीके १५औं वार्षिक साधारण सभा

पहुरा | २७ पुष २०८१, शनिबार
पहुरा कृषि सहकारीके १५औं वार्षिक साधारण सभा

पहुरा समाचारदाता
सुखड, २७ पुस ।
कैलाली जिल्लाके घोडोघोडी नगरपालिका–४, भालुफाँटामे रहल पहुरा कृषि सहकारी संस्था लिमिटेडके १५ औं वार्षिक साधारण सभा शनिच्चरके रोज सम्पन्न हुइल बा ।

घोडाघोडी नगरपालिका वडा नम्बर ४ के वडा सदस्य रत्न सन्जालके वरका पहुनामे हुइल कार्यक्रममे उहाँ यी सहकारीसे कृषकहुकनके ढेर फाइदा पुगल बटैलै । उहाँ कहलै, ‘ग्रामीण क्षेत्रके कृषकहुकन समस्या सहकारीसे बुझले बा । कृषि सहकारी कृषकहुकनके सहगोगीके रुपमे काम करले बा ।’ सहकारीहे बल्गर बनैना स्थानीय सरकारसे खेले पर्ना भुमिकामे कौनो कमी नैरना बटैलै ।

कार्यक्रमके विशिष्ट पहुना समाजसेवी तथा बुद्धिजीवि सिताराम चौधरी सहकारीसे सीमान्तकृत वर्ग, समुदायके जीवन उकस्ना भारी योगदान पुगैटी रहल बटैलै । उहाँ कहलै, ‘पहिले कृषकहुकन चाहल मल खाद उपलब्ध करैना कर्रा रहे । अब्बे यी सहकारीसे मजा भुमिका निर्वाह करले बा ।’ सहकारीहे शेयर सदस्यहुक्रे आपन मानके आघे बह्रनाफे उहाँ आग्रह करलै ।

सहकारीके पूर्व अध्यक्ष वेद प्रसाद चौधरी यी सहकारीहे यहाँसम पुगैना टमान बाधा अर्चन भोगे परल बटैलै । उहाँ कहलै, यी सहकारीसे आपन जग्गामे दुई तल्ले भवन बनाइल कारण ओहोर खर्च हुइल बा ।’

घोडाघोडी आधारभूत विद्यालय व्यवस्थापन समिति अध्यक्ष करुणा रावत सहकारीके शुभकामना मन्तव्य व्यक्त करटी सहकारीबारे बुझना जरुरी रहल बटैली । उहाँ यी सहकारीसे पारदर्शि रुपमे आघे बह्रल बटैली ।

कार्यक्रममे रामशिखरझाला कृषि सहकारीके अध्यक्ष सीता चौधरी, भल्मन्सा मोतीराम चौधरीलगायत मन्तव्य व्यक्त करल रहिट । सहकारीके प्रगती विवरण, आयव्यय विवरण प्रस्तुत कालीचरण चौधरी करल रहिट ।

सहकारीे अध्यक्ष विन्तीराम चौधरीके अध्यक्षतामे हुइल कार्यक्रममे स्वागत मन्तव्य सीता चौधरी, संचालन पुरन चौधरी करल रहिट ।

ओस्टेक करके सहकारीके वार्षिक साधारण सभाके अवसरमे सहकारी आयोजना तथा संजिवनी अस्पताल प्रालि धनगढीके सहयोगमे निशुल्क स्वास्थ्य शिविर संचालन कैगिल बा । उ स्वास्थ्य शिविरमे १७० जाने निशुल्क चेकजाँच तथा औषधी उपचार पाइल सहकारीके अध्यक्ष विन्तीराम चौधरी बटैलै ।

जनाअवजको टिप्पणीहरू