२६.७३ प्रतिशत निक्षेप संकलन वृद्धि

पहुरा समाचारदाता
धनगढी, २८ पुस । धनगढीस्थित हिमशिखर बहुउद्देश्यीय सहकारी संस्था लिमिटेडके निक्षेप संकलनमे वृद्धि हुइल बा ।
सहकारीके आर्थिक वर्ष २०८०/०८१ मे २६.७३ प्रतिशत निक्षेप संकलन वृद्धि हुइल शनिच्चरके रोज सम्पन्न हुइल सहकारीके १६ औं वार्षिक साधारण सभामे जनाइल बा ।
सहकारी यी आर्थिक वर्षमे ५० करोड २३ लाख ५९ हजार ९ सय ६२ रुपैयाँ निक्षेप संकलन करले बा । गैल आर्थिक वर्षमे ३९ करोड ७३ लाख ९७ हजार सात रुपैयाँ निक्षेप संकलन करले रहे । गैल आर्थिक वर्षसे १० करोड ५९ लाख ६६ हजार ९ सय ५५ रुपैयाँ ढेर हो ।
सहकारी आर्थिक वर्ष २०८०/०८१ मे ३ करोड ५४ लाख १५ हजार एक सय १३ रुपैयाँ आम्दानी करले बा । यी गैल आर्थिक वर्षसे ७.२७ प्रतिशत कम रहल सहकारी जनैले बा । नौ करोड ५५ लाख ६४ हजार आठ सय ३७ चालु सम्पत्ती मौज्दात रहल संस्थाके चार करोड ७० लाख १० हजार दुई रुपैयाँ स्थिर सम्पत्ती रहल जनाइल बा ।
आर्थिक वर्ष २०८०/०८१ के मसान्तमे १९।०२ प्रतिशत तरलता कायम रहल सहकारी जनैले बा । अस्टेके, आर्थिक वर्ष २०८०÷०८१ के अन्त्यसम कुल लगानीके तुलनामे भाखा नाघल ऋणके अनुपात १.५३ प्रतिशत कायम रहल बा ।
सहकारीके आर्थिक वर्ष २०८०/०८१ के अन्त्यसम ५९ करोड ३८ लाख ६३ हजार सात सय ऋण तथा असुली
बाँकी रहल जनाइल बा । सहकारीके वार्षिक साधारण सभाके उद्घाटन राष्ट्रिय सभा सदस्य नारायणदत्त मिश्र उद्घाटन करले रहैं ।
उ अवसरमे राष्ट्रिय सभा सदस्य मिश्र सहकारी एकसे टमान ओ टमानके एकसे सहयोग करना संस्थाके रुपमे रहल बटैले रहैं । उहाँ कौनो फेन काम करेक लाग संगठनके आवश्यकता परल ओरसे सहकारी महत्व रहल बटैले रहैं ।
उहाँ कलैं, “गाउँक सामान्य किसान बैंकसे ऋण खेलाइ नैसेकठ । ओकर ऋणके सहयोगी कलेक सहकारी हो ।” उहाँ सहकारीमे रहल टमान कमी कमजोरीहे सुधार करटि सहकारीहे अवल ओ समृद्ध कराइ परनामे जोड डेले रहैं ।
उ अवसरमे संस्थाहे महत्वपूर्ण योगदान करल टमान व्यक्तित्वनहे सम्मान फेन करल बा । सहकारी उत्कृष्ट कर्मचारीके रुपमे अमृता सिंह ठकुरीहे पाँच हजार नगदसहित प्रशंसापत्र, सहकारी क्षेत्रमे कलम चलाइल वाफत नेपाल पत्रकार महासंघ कैलालीके अध्यक्ष श्रवण देउवाहे पाँच हजार एक सय ५५ नगदसहित प्रशंसापत्रसे सम्मान करले बा ।
अस्टेक, जेष्ठ सदस्य रणबहादुर शाही, विष्ना पाठक, तोयानाथ जोशी, तेजराम डंगौरा, उत्कृष्त बचतकर्ता सुरेन्द्रलाल श्रेष्ठ, रुपा ओझा, पुष्पा भट्ट, मीनादेवी चौधरी, देवराज भट्ट ओ असल ऋणी नैनबहादुर खड्का, कुन्तीदेवी श्रेष्ठ, अर्जुन चौधरी, जयराम चौधरी, दिपेश चौधरीहे सम्मान करले बा ।
कार्यक्रममे जिल्ला सहकारी संघके चिरञ्जीवी बडू, सहकारी रजिष्ट्रार तथा प्रशिक्षक कार्यालयके अधिकृत देवराज पन्त, शेयर सदस्य केशव रावल, भवानीप्रसाद जोशीलगायत मन्तव्य व्यक्त करले रहैं ।
सहकारीके अध्यक्ष दुर्गाप्रसाद भण्डारीके अध्यक्षतामे हुइल कार्यक्रममे लेखा समिति संयोजक पुष्पराज ओझा लेखा प्रतिवेदन ओ व्यवस्थापक महेन्द्र शाही आर्थिक प्रतिवेदन प्रस्तुत करले रहैं । कार्यक्रमके सञ्चालन सचिव विमलकुमार जोशी करले रहैं ।
