थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

कैलारी गाउँपालिका–४ मे रहल भल्मन्साहुकनहे सम्मान ओ विदाई कार्यक्रम

पहुरा | २८ पुष २०८१, आईतवार
कैलारी गाउँपालिका–४ मे रहल भल्मन्साहुकनहे सम्मान ओ विदाई कार्यक्रम

पहुरा समाचारदाता
हसुलिया, २८ पुस ।
कैलाली जिल्लाके कैलारी गाउँपालिका वडा नम्बर ४ मे रहल भल्मन्साहुकनहे सोम्मारके रोज सम्मान तथा विदाई कार्यक्रम कैगिल बा ।

वडामे रहल भल्मन्साहुकनहे कैलारी गाउँपालिका वडा नम्बर ४ के कार्यालयके आयोजनामे सम्मान ओ विदाई कार्यक्रम कैगिल हो । कैलारी गाउँपालिका अध्यक्ष राजसमझ चौधरी भल्मन्साहुकनहे अविर टिका लगाके ओ सम्मानपत्र हस्तान्तरण करल रहिट । कार्यक्रममे सम्बोधन करटी उहाँ थारु समुदायमे प्रत्येक बर्ष भुरा खेल, खोज्नीबोझनी कैना ओ लौवा भल्मन्सा छनौट कैना परम्परा रहल बटैलै । उहाँ कहलै, गाउँपालिकासे भल्मन्सा प्रथाके सरक्षणके लाग भल्मन्सा ऐन बनाइल बा । भल्मन्साहुक्रे समाजसेवा करटी आइल ओरसे ओइनके श्रमके कदर कैना जरुरी रहल ओ वडा नम्बर ४ के कार्यालयसे मजा कामके थालनी करले बा ।’

गुणस्तरीय शिक्षाके लाग गाउँपालिकासे कक्षा ८ ओ १० विद्यार्थीनहे कोचिङ कक्षााके लाग ११ लाख ९५ हजार बजेट विनियोजन करल बटैलै ।

कार्यक्रममे वडा स्तरीय भल्मन्सा समिति संयोजक जगलाल चौधरी अपने आठ बरषसे संयोजकके रुपमे कार्यरत रहल ओरसे यी बरस कोई लौवा मनै अइलेसे मजा रना बटैलै ।

वडा नम्बर ४ के वडा अध्यक्ष ठागुराम चौधरीके अध्यक्षतामे हुइल कार्यक्रममे उहाँ भल्मन्साहुक्रे समाजसेवामे पुगाइल योगदानके कदर करटी सम्मान ओ बधाई कार्यक्रमके आयोजना करल बटैलै ।

कार्यक्रमके संचालन वडा सदस्य सुवा परियार करल रही । कार्यक्रममे कार्यपालिका सदस्य लालबहादुर विक, वडा सदस्य लक्ष्मी चौधरीलगायतके उपस्थिति रहे । कैलारी गाउँपालिका वडा नम्बर ४ मे २२ जाने भल्मन्सा रहल बटै ।

जनाअवजको टिप्पणीहरू