थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

सुर्खेतमे माघ मिलन कार्यक्रम

पहुरा | ५ माघ २०८१, शनिबार
सुर्खेतमे माघ मिलन कार्यक्रम

वरिष्ठ थारु साहित्यकार पन्ना सम्मानित

पहुरा समाचारदाता
सुर्खेत, ५ माघ ।
माघ पर्वके अवसरमे कर्णाली प्रदेशके राजधानी वीरेन्द्रनगरमे माघी मिलन कार्यक्रम कैगिल बा ।
थारु कल्याणकारिणी सभा सुर्खेत, लखागिन थारु उत्थान मञ्च, सुर्खेत ओ राष्ट्रिय थारु कलाकार मञ्च शाखा सुर्खेतके संयुक्त आयोजनामे विविध सांस्कृतिक नाचगान झाँकीसहित माघ मिलन कार्यक्रम कैगिल हो ।

थारु कल्याणकारिणी सभाके सभापति बेचुलाल चौधरीके सभाध्यक्षता ओ वीरेन्द्रनगर नगरपालिकाके नगरप्रमुख मोहनमाया ढकालके बरका पहुनाईमे माघ मिलन कार्यक्रम हुइल बा ।

कार्यक्रमके वरका पहुना वीरेन्द्रनगर नगरपालिकाके नगर प्रमुख मोहनमाया ढकाल थारुनके महान राष्ट्रिय माघ पर्व हुइलक ओरसे यिहीहे बचाइक लाग थारु समुदाय लागि पर्लकमे खुशी व्यक्त करली ।

नेपाल विविधतायुक्त देश हो । अन्य समुदाय जस्टे हमार समाजमे रहल थारु समुदाय संस्कृतिफे बहुत धनी रहलक कारण पुराना मौलिक मूल्यमान्यता, परम्पराह पुस्तान्तरण कर स्याक परठ,’ उहाँ कहली, ‘पुरान लोक परम्परा संस्कृति लौव पुस्तामे हस्तान्तरण हुई निसेक्लसे लोप हुइना सम्भावना रहठ । ओहमार आसिन कार्यक्रम जरुरी बा ।’

नगर प्रमुख कहलै, ‘हरेक जातिके संस्कृति देशके सम्पदा हो । थारु संस्कृतिफे देशके सम्पदा हुइलक कारण यकर संरक्षणमे आपन ओरसे सहयोग कर्ना प्रतिवद्ध बाटु । यी मेरिक कार्यक्रमसे छिट्कल मनहे एकिकृत कर्ना मद्दत हुइना ओरसे असिन मेला महोत्सवहे निरन्तरता दिह पर्ना जरुरी बा ।’

लखागिन थारु उत्थान मञ्च, सुर्खेतके अध्यक्ष एवम् वरिष्ठ साहित्यकार संस्कृतिविद मानबहादुर चौधरी ‘पन्ना’ थारु समुदायके महान पर्व माघसे थारु जातिनके इतिहास, चालचलन, सामाजिक सांस्कृतिक पक्ष, पौराणिक धार्मिक मूल्य मान्यता आपन मेरके मौलिकपन ओ फरक संस्कार रहलक कारण माघ पर्व थारु समुदायके गौरव ओ पहिचान रहल बटैलै ।

सुर्खेतके थारु जाति कर्णाली प्रदेशके पहिचान हुइट तर माघ पर्वके लाग कर्णाली प्रदेशके प्रदेश सरकार एवम् स्थानीय सरकारके उदासिनताके कारण विगतठेसे हर्षोल्लासपूर्वक मनाइ निसेक्लक गुनासो व्यक्त करलै । राजधानीके मुटुमे रहल थारु कर्णालीके भिन्न पहिचान डेना थारु समुदायहे राज्य उपेक्षा कर्लक जिकिर करलै ।

सुर्खेतके थारु समुदाय सहाराविहीन टुवर नागरिक असक हरेक बरस एकठो जाबो कार्यक्रम करक लाग वडा वडा ढाइ पर्ना स्थितिके कारण थारु अगुवाहुक्रे निराश हुइपर्ना विडम्बना रहल बाट बटैले ।

कार्यक्रमम थारु कल्याणकारिणी सभाके केन्द्रीय सदस्य कृष्ण बहादुर थारु, लखागिन थारु उत्थान मञ्च, सुर्खेतके सल्लाहकार जागुराम थारु, आदिवासी जनजाति महासंघके अध्यक्ष अशोक राजी, जनजाति महासंघके प्रदेश अध्यक्ष बिरबहादुर भोटे, कुमाल समाजके इन्द्र कुमाल लगायतके वक्ताहुक्रे आपन आपनविचार व्यक्त करल रहिट ।

माघ मिलन कार्यक्रममे थारु भाषा कला साहित्य संस्कृति ओ समाजसेवामे योगदान डिहुइया व्यक्तित्वहुकनहे सम्मान कैगिल बा । सम्मानित हुइनामे नेपाल सरकारके संस्कृति ओ नागरिक उड्डयन मन्त्रालयसे भाषा तथा साहित्यमे विधाम प्रादेशिक प्रतिभा पुरस्कार २०८० से सम्माननि स्रष्टा, थारु संस्कृतिविद एवम् वरिष्ठ साहित्यकार मान बहादुर चौधरी ‘पन्ना’ हुकिहिन् बधाई तथा सम्मान करल बाटिन् । साहित्यकार पन्ना लगायत थारु कला संस्कृति संरक्षणम टेवा पुगाइल समाजसेवी व्यक्तित्व स्वर्गीय शनिश्रा महतम दहितहे मरणोपरान्त सम्मान कर्लिन् । ओसहके सम्मानित हुइनामे समाजसेवी थारु कल्याणकारिणी सभाके पूर्व केन्द्रीय सदस्य मानबहादुर चौधरी, मिना चौधरी, अशोक चौधरी रहल बटै ।

माघ मिलन कार्यक्रममे टमान गाउँसे आइल कलाकार हुक्र टमान मेरके मघौटा नाच प्रस्तुत करल रहिट । कार्यक्रममे थारुकल्याण कारिणी सभाके जिल्ला उपसभापति सितल्ली चौधरी स्वागत मन्तव्य डेल रही कलसे कार्यक्रमके सञ्चालन थारु कल्याणकारिणी सभाके सचिव डिलबहादुर चौधरीे करल रहिट ।

जनाअवजको टिप्पणीहरू