किचाही गाउँ मघौटा नाचसे चम्पन हुइना

पहुरा समाचारदाता
धनगढी, १० माघ । कन्चनपुरके कृष्णपुर नगरपालिका वडा नम्बर ४ किचाही गाउँ इहे माघ ११ गते थारु सांस्कृतिक नाचसे चम्पन हुइ जैटी बा । वडा नम्बर ४ भलमन्सा समितिके आयोजनामे इ पहिल मघौटा साँस्कृतिक कार्यक्रम हुइ जाइटा ।

कार्यक्रममे थारु संस्कृति झल्कना मेरमेराइक सखिया नाच, झुमरा नाच, हुरडुङ्ग्वा नाच, छोकरा नाच संगे टमान कलाकार लोगनसे मैगर मैगर पुरनियाँ गीतबाँस, ढमार, मागर, सजनाके राग सुने मिल्ना बा ।

माघके सुभ सल्लाह पारके पहिलचो अइसिन कार्यक्रम करे जैटी रहल भलमन्सा समितिके सचिव गोपिलाल चौधरी बटैलैं । उहाँक खबर करल अन्सार इ पहिलचो थारु साँस्कृतिक कार्यक्रम करे लागल बटैलैं । जहाँ मेरमेराइक थारु पुरखनियाँ गीतबाँस ओ नाचगान डेखा जैना बा ।

मघौटा साँस्कृतिक कार्यक्रम हुइलेक ओर्से आधुनिक से फें लोकगीत, लोकसंस्कृति फे जेडा प्राथमिकता डेना आयोजक बटैले बा । इ कार्यक्रममे गाउँक बुद्धिजीवी लोगनके थारु रहनसहन, संस्कृतिके बातचित, लावा लावा गोचागिचिनके चम्पन नाचकोर, जवान जवान साहित्यकार लोगन के कविता, गजल, मुक्तक ओ बहुट मेरिक लावा लावा ज्ञानगुण फे हेरे ओ सिखे पैना आयोजकके कहाइ बा ।