थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

आदिवासी जनजाती थारु खाद्य विविधता प्रदर्शनी तथा माघ मिलन कार्यक्रम

पहुरा | १६ माघ २०८१, बुधबार
आदिवासी जनजाती थारु खाद्य विविधता प्रदर्शनी तथा माघ मिलन कार्यक्रम

पहुरा समाचारदाता
हसुलिया, १६ माघ ।
कैलाली जिल्लाके कैलारी गाउँपालिका वडा नम्बर ४ के गाउँमे आदिवासी जनजाती थारु खाद्य विविधता प्रदर्शनी तथा माघ मिलन कार्यक्रम सम्पन्न हुइल बा ।

‘हमार भाषा कला, संस्कृति हमार पहिचान, हमार भेषभुष हमार शान कना मुल नाराके साथ कैलारी गाउँपालिका वडा नम्बर ४ के आयोजना तथा सहास नेपालके सहकार्यमे आदिवासी जनजाती थारु खाद्य विविधता प्रदर्शनी तथा माघ मिलन कार्यक्रम हुइल हो ।

कैलारी गाउँपालिका अध्यक्ष राजसमझ चौधरीके वरका पहुनामे हुइल कार्यक्रममे सम्बोधन करटी उहाँ यी कार्यक्रमसे भाषा कला, संस्कृति भेषभुषके संरक्षणके साथे थारु खानाके प्रवद्र्धनमे टेवा पुगल बटैलै ।

हमार पहिरन, लगान, भोजकाज, चाडपर्व, औपचारिक कार्यक्रम सिमिट हुइल बा,’गाउँपालिका अध्यक्ष कहलै, ‘यकर संरक्षणके लाग सक्कु जाने लागे पर्ना जरुरी बा । गाउँपालिकासे हमार पहिरन संरक्षणके लाग वडा वडामे थारु लेहगा सिल्ना तालिम डेहल बा । ढकिया बुन्ना तालिमफे डेहल बा ।’

कैलारी गाउँपालिका वडा नम्बर ४ के आयोजनामे एक चो मन्डरा बजैना, मन्डरा बोलैना तालिमफे प्रदान करल उहाँ बटैलै । थारु समुदायके खानपानके अपने पहिचान बा । मने अल्छी मानके आज काल्ह मेहनत करे छोरल उहाँ बटैलै ।

कार्यक्रमके विशिष्ट पहुना गाउँपालिका उपाध्यक्ष भगवतीकुमारी चौधरी थारु समुदायके पहिचान जोगैनामे महिलाके भारी योगदान रहल बटैली । उहाँ कहली, ‘हरेक भोजकाज, चाडपर्वमे महिला आपन मौलिक पहिरन घल्ना करठै मने थारुमनै लाज मान्के सर्ट पैन्ट घल्ना करठै ।’

थारु समुदायके महिलासे घल्ना लेहंगा आर्कषक रना ओरसे यी पहिरन गैरथारु समुदायफे मन पराइल उहाँ बटैली । लेंहगा चोलियाके व्यवसाय अब्बे ठाउँ ठाउँमे चम्के लागल उहाँ बटैली ।

थारु समुदायसे माघ टिहुवार मनैना बेग्लै तरिका बा,’ गाउँपालिका उपाध्यक्ष कहली, ‘माघ १ गते लहाके मान्यजनहुकनके ढोगसलास लग्ना, चेलिवेटीनहे निसराउ डेना चलन बा । गाउँघरमे लौव नेतृत्व छनौट कैना, लौवा योजना बनैना करजाइठ ।’
थारु समुदायमे टमान मेरिक खानपान बा, उहीहे मजासे मिलाके खैलेसे कुपोषणसे बाँचे सेक्न उहाँ बटैली । पहिले–पहिले थारुगाउँघर कुपोषण लागल ढेर लर्का रहिट । गाउँपालिका पोषणओर विशेष महत्व डेहल गाउँपालिका उपाध्यक्ष बटैली ।

कार्यक्रमम कैलारी गाउँपालिका वडा नम्बर ४ के वडा अध्यक्ष ठागुराम चौधरीके अध्यक्षतामे हुइल रहे । उहाँ भाषा कला, संस्कृति संरक्षणके लाग वडा कार्यालयसे निरन्तर माघ मिलन कार्यक्रम करटी आइल बटैलै । वडा नम्बर ४ मे टमान समुदायके बसोवास रहल ओरसे सक्कु जानेक भाषा, कला,संस्कृति संरक्षणमे लागल उहाँ बटैलै ।

कार्यक्रममे थारु कल्याणकारिणी सभाके केन्द्रीय पार्सद मनिराम चौधरी, भल्मन्सा जगलाल चौधरीलगायतसे मन्तव्य राखल रहिट । कार्यक्रमके संचालन वृक्षलाल चौधरी, सविता चौधरी ओ सुनिता चौधरी करल रहिट । स्वागत मन्तव्य वडा नम्बर ४ के वडा सदस्य मोहनलाल चौधरी करल रहिट ।

कार्यक्रममे कृषि खेती करुइया असल कृषक विन्तीराम चौधरीहे प्रशंसापत्रसे सम्मान कैगिल रहे । कार्यक्रममे कार्यपालिका सदस्य लालबहादुर विक, वडा सदस्य लक्ष्मी चौधरी, हरिद्वारी चौधरीलगायत टमान संघसंस्था प्रतिनिधि, भल्मन्साहुकनके सहभागिता रहे । कार्यक्रममे थारु तथा गैरथारु समुदायके टमान नाँचके झाँकी ओ थारु खाना प्रदर्शनी हुइल रहे ।

जनाअवजको टिप्पणीहरू