भजनीमे पोषण प्रदर्शनी मेला सम्पन्न

पहुरा समाचारदाता
धनगढी, ४ जेठ । कैलाली जिल्लाके भजनी नगरपालिकामे पोषण प्रदर्शनी मेला २०८३ कार्यक्रम सम्पन्न हुइल बा । पोषणबारे जानकारी करैटी कुषोषण न्यूनिकरणके लाग पोषण प्रदर्शनी मेलाके आयोजना कैगिल हो ।

भजनी नगरपालिकाके आयोजनामे केयर नेपाल, केयर नेपाल ओ आइडिई के आर्थिक सहयोग तथा याक नेपालके समन्वय सहकार्यमे पोषण मेलाके आयोजना हुइल बा ।

नगर उपप्रमुख राजु तिरुवाके प्रमुख आतिथ्यतामे हुइल कार्यक्रममे उहाँ पोषणयूक्त खानाहे दैनिक जीवनसे जोरे सेक्लेसे केल्ह कृपोषण हटाई सेक्ना बटैली । उहाँ कहली, पोषण हमार जीवनके लाग महत्वपूर्ण हो । खानापानहे ध्यान डेहे परठ । पोषणयूक्त खाना नैखाके जंङक फुड खाइलपाछे टमान रोगके शिकार हुई पुगल बटी । महिलाहुक्रे बच्चा जल्मैना करठै । उ संगे स्याहार सुसारफे करठै । खाना पकैना जिम्मा महिलाहे डेहल रहठ टबमारे खानापानफे पोषणयूक्त बनैना चाही ।

बच्चनहे बजारके जंङक खवैनाफे आपन उत्पादन करल घरेलु अर्गयानिक टिनामे ध्यान डेनाफे नगर उपप्रमुख तिरुवा आग्रह करली । उहाँ एक घरमे आम, लिची लगैलेसे महत्वपूर्ण योगदान पुगैना बटैली ।

बालबालिका राष्ट्रके गहना रहल कहटी छोटिहीसे पोषणमे ध्यान डेलेसे शारिरीक मानसिक बृद्धि विकास हुइना उहाँ बटैली । यूक्त खाना सक्कु जाने खाई पर्ना जरुरी बा । एक लरकोरया डाई मनै खैही कलेसे ओइनके बच्चा फे मजा रहिही, बच्चा खाना खाई मेरिक हुईही कलेसे ओइनफे खवैना जरुरी बा ।

कार्यक्रममे भजनी नगरपालिकाके प्रमुख प्रशासकीय अधिकृत भोजराज भट्ट पोषण प्रदर्शनी भेला पालिकाहे पोषणमैत्री पालिका घोषणा कैनामे सहयोग पुग्ना बटैलै । उहाँ कहलै, हम्रे पालिकाहे पोषणमैत्री घोषणा कैना तयारीमे जुटल बटी यी फे एक ठो खुडकिला हो । टमान चरण पार करेक लाग यी कार्यक्रम कैना जरुरी हो ।

यी कार्यक्रम अपनहे नौलो लागल मने स्वागतके लाग बनाइक माला, नृत्य, खानपानफे पोषणसे जोरल बा ।

भजनी नगरपालिकाके स्वास्थ्य शाखा प्रमुख कैलाश चौधरी यी पालिकाहे पोषणमैत्री बनाइक लाग सक्कु क्षेत्र लागल बटैलै । सेकटसम यिहे बरष पोषणमैत्री पालिका घोषणा कैना उहाँफे बटैलै । पोषण बोट विरुवासे मानव जल्मलसे नैमरट चाहना ओरसे बच्चनहे छोटिहीहसे पोषणयू क्त खाना खवैलेसे आवश्यक रहल बटैलै । पोषणयूक्त खाना नैखैना जंङकफुड खाना खैना प्रवृति बह्रल बा, जिहीहे नैसरना रोग बह्रल बा कलेसे क्यान्सरफे बह्रल उहाँ बटैलै । विषादीयूक्त खानाके प्रयोग बह्रल कारण स्वास्थ्यमे झन समस्या बह्रल उहाँ बटैलै ।

कार्यक्रममे शहरी स्वास्थ्य भजनीके प्रमुख नवराज चौधरी, महिला स्वास्थ्य स्वयं सेविका यमुना साउदलगायत मन्तव्य व्यक्त करल रहिट । भजनी नगरपालिका वडा नम्बर ७ के वडा सदस्य रुपक लोनियाके अध्यक्षतामे हुइल कार्यक्रममे कार्यक्रम हुइल रहे । पोषण प्रदर्शनी मेलामे पोषणयूक्त खाना, पोषणयूक्त टिना टावनके प्रदर्शनीके संगे पोषण सम्बन्धी सचेतनामुलक थारु नाँच, डेउडा, होरी नाँचफे डेखागैल रहे । कार्यक्रमके संचालन धमेन्द्र विष्ट करल रहिट । कार्यक्रममे वडा वडा सदस्य, टमान शाखाके प्रमुख, स्वास्थ्यकर्मी, याक नेपालके प्रतिनिधि, टमान गाउँक भल्मन्सा, स्वास्थ्य आमा समुह, सिमा प्रहरी कार्यालयके प्रमुखलगागत सहभागिता रहे ।

याक नेपालके लैङिक समानता सामाजिक समावेशीकरण अधिकृत सरिता चौधरी पोषण परियोजना मार्फत भजनीके टमान आमा समुहहे पोषण सुधारके लाग पोषण बगैचा सुरुवाट करल बटैली ।

हजार दिनके लरकोरया डाई ओ बच्चाके पोषण सुधारके लाग पोषणके गतिविधि करजैटी बा, उहाँ कहली, ‘सीमान्तकृत समुदायके लाग विउ पुँजीके रुपमे १० हजार रुप्या सहितके किसान कार्ड उपलब्ध करागैल बा । जिहीहे उ समुहमे रहल लरकोरया डाई सागपात, हरियार टिना टावन उत्पादनके लाग विया किन्ना, पोषण बगैचा निर्माण कैना ओ टिना उत्पादन अन्र्तगत कृषि कार्यमे प्रयोग हुइना समान किन्ठै ।

याक नेपालसे आमा समु्हमे आवद्ध रहल ६ सय जनहनहे किसान कार्ड उपलब्ध करैले बा, जौन कार्डमे टिनाके विया, हजारी, पानी डरना पाइप, जाली, उत्पादन पोषण बगैचाके लाग सपोट करल उहाँ बटैली ।

पोषण बगैचामे टमान मेरिक हरियार साग, मौसमी तथा वेमौसमी टिना उत्पादन कैगिल बा । कलेसे महिलाहुकनके बच्चनके लाग झोल लिटो पकैना तरिकाफे सिखागैल बा । पोषण परियोजना लागु हुइलपाछे पोषणयूक्त खानाके साथे स्वास्थ्य संस्थामे समय समयमे चेकजाँच करैटी रहलपाछे माध्यम कुपोषणके केसहे सामान्य अवस्थामे ल्यन्ना मद्दत मिलल उहाँ बटैली ।