धनगढीमे ६० हजार ७२१ हे कोरोना खोप
पहुरा समाचारदाता
धनगढी, ४ कुँवार । धनगढी उपमहानगरपालिका हालसम ६० हजारसे ढिउर जनहनहे कोभिड–१९ विरुद्धके खोप लगाइल जनैले बा ।
उपमहानगरपालिकाके स्वास्थ्य शाखा प्रमुख कृष्णबहादुर बोहरा कोभिड–१९ बिरुद्धके पहिल खोप ६० हजार ७ सय २१ जनहनहे लगासेकल बटैलै । उहाँ डुनु खोप भर ४५ हजार ३ सय १९ जनहनहे किल लगाइल बटैलै ।
ओस्टके उपमहानगरपालिकासे नियमित पिसिआर परिक्षण समेत करटी रहल बा । उपमहानगरपालिकासे हालसम १६ हजार ५ सय ८० जनहनके पिसिआर परिक्षण करसेकल जनाइल बा । उपमहानगरपालिका परिसरमे बिदाके दिन बाहेक दैनिक सकारे १० बजेसे १२ बजेसम पिसिआर परिक्षणके लाग स्वाब संकलन हुइटी रहल स्वास्थ्य शाखा प्रमुख बोहरा बटैलै ।
खोपहे निरन्तरता डेना बटैटी धनगढी उपमहानगरपालिकाके मेयर नृपबहदुर वड कार्तिक मसान्तसममे खोप लैना उमेर समूहके सक्कु नगरबासीहे कोभिड–१९ विरुद्धके पुर्ण खोप लगासेक्ना बटैलै ।
धनगढी उपमहानगरपालिका प्रवेश करुइया गौरीफन्टा नाका, गेटा बिमानस्थल ओ धनगढी उपमहानगरपालिका परिसरमे हाली नियमित खोपके व्यवस्था मिलाजैना मेयर वड बटैलै ।
खोपहे पहिल प्राथमिकतामे रख्टी खोप भन्डारणके लाग आवस्यक पर्ना उपकरण उपमहानगरपालिकासे खरिद करसेकल बटैटी मेयर वड अपुग सामाग्रीके लाग टमान दातृ निकाय ओ स्थानीय संघसंस्थाहे आग्रह करसेकल बटैलै । उहाँ सक्कु जनहनके सहयोग हुइलेसे नियमित खोप कार्यहे निरन्तरता डेना सहज हुइना बटैलै ।
धनगढी बाहरसे मनै खोप लगाइक लाग किल धनगढी अइना वातावरण सृजना कैना अपने लागल मेयर वड बटैलै । ‘प्लेन चहुरके मनै खोप लगाइक लाग धनगढी आइल यहाँहुक्रे सुन्न ओ डेखे पैबी,’ मेयर वड कहलै ।
