अत्तरियामे निःशुल्क आँखी जाँच शिविर
अत्तरिया, ४ कुवाँर । अत्तरियाके जनकल्याण मावि तेघरीमे निःशुल्क आँखी जाच शिविर हुइल बा ।
नेपाल नेत्रज्योति संघ, गेटा आँखा अस्पताल ओ लायन्स क्लब अफ अत्तरिया सिटीके आयोजना तथा ड्याकफाउण्डेशनके सहयोगमे शिविर हुइल हो । शिविरमे ५ सयसे ढिउर जाने आँखी जाँच कराइल रहिट ।
ओस्टके ७० जाने मोति विन्दु लगायतके आँखीके बिरामीहे निःशुल्क शल्यक्रियाके लाग गेटा आँखा अस्पताल पठाइल रहे । १ सय ५५ जनहनहे निःशुल्क चश्मा उपलब्ध करैनाके साथे २ सय ८० जाने आँखीके रोगीहे निःशुल्क औषधि उपचार समेत करल रहे ।
शिविरमे सेवा लेहुइया मध्ये कुछ आर्थिक अभाव तथा सेवा लेहे अस्पताल आइ नैसेकल मोतिविन्दुके कारणसे डुनु आँखीके दृष्टि गुमाके लम्मा समयसे कष्टकर जीवन निर्वाह करटी रहल बिरामी फेन रहिट ।
गेटाआँखा अस्पतालके बरिष्ठ नेत्र अधिकृत रमेश चन्द्र भट्टके नेतृत्वमे संचालित उक्त आँखाशिविरमे १२ जाने प्राविधिकहुक्रनके टोलीसे सेवा प्रदान करल रहे ।
शिविर व्यवस्थापनमे नेपाल नेत्रज्योति जिल्ला शाखा कैलाली, लायन्स क्लब अफ अत्तरिया सिटीके पदाधिकारी ओ जनकल्याण माविके शिक्षक, विद्यार्थीहुक्रे सहयोग करल रहिट ।
