आर्थिक सशक्तिकरणके लाग यूवा उद्यमशिलतामे लग्ना आवश्यक
पहुरा समाचारदाता
धनगढी, ८ कुवाँर । धनगढी उपमहानगरपालिकाके उपप्रमुख सुशीला मिश्र भट्ट आर्थिक सशक्तिकरणके लाग यूवा उद्यमशिलतामे लग्ना जरुरी रहल बटैले बटी ।
वुमन एक्ट, पौरखी नेपालके आयोजना तथा यूएन वुमनके आर्थिक सहयोगमे विफेक रोजसे सुरु हुइल तीन दिवसिय प्रशिक्षक प्रशिक्षण तालिममे उद्घाटन कार्यक्रममे उहाँ सबसे भारी आर्थिक क्रियाकलाप बटैली ।
‘आर्थिक रुपमे बलगर नइहुइलेस ना देश बल्गर हुई, उहाँ कहली– ‘हम्रे नोकरी वेसमे हुइटी, आजकाल्ह अपन छावा छाईहे नोकारी लगाडी कहटी ढेर मनै अइठै । नोकारी सक्कु चिजके समाधन नइहो, नेपाल ओटरा ढेर नोकारी पैना अवस्थाफे नइहो, काहेकी यहाँ प्रशस्त उद्योग करखाना नइहो, भारी भारी व्यवसाय नइहो, ढेर अफिसफे नइहो, यी कारण नोकरी मिल्ना अवस्था नइहो ।’
अमेरिकाके उदाहरण डेटी विद्यार्थीफे पाकेट खर्चके छोट–छोट काम करटी रहल मने नेपालमे यूवाहुक्रे अपन डाई बाबासे पैसा नइडेलेसे जग्गा माग करटी रहल उहाँ बटैली । सक्कु चिज डाईबाबासे ठुटे परठ कना यहाँ अभ्यास रहल उहाँ कहली । नेपालमे कामके सम्मान नइरहल बटैटी, छोट–छोट व्यापार संचालन कैकेफे आब अपन लाग अपनही कमैना चाही, आब डाई बाबासे मागके गुजारा चलैना दिन गैल ।
दुसर प्रसङमे बोल्टी उहाँ बाल विवाहमे ढेर विवाद आइटा, भोज चाही २० बरस पहिले करजैटी रहल बा । कानूनसे चाही २० बरस पुग्लेसे केल मान्यता डेटी रहल उहाँ कहली । यैसिन घटना बह्रटा जेम्ने यूवाहे करणीके मुद्दा, बन्धक बनाइल मुद्दा लगाटा, ढेर यूवा थुनुवामे परटै, छावा २० बरस छाई १९ बरसके रहल बटै, घरेक मनै यिहीहे ललाई फलाई लैगिल कहलपाछे करणी मुद्दा लागठ, यी जोखिमपूर्ण मुद्दा हो उपप्रमुख मिश्र भट्ट कहली । टबमारे यी विषयमे यूवाहे ढेर सचेत कराई परल, यैसिन भोज बडर हुइठ, समाजमे सचेतना जगैना चाही, कानूनसे बाहेरके काम करलेसे डण्डनीय हुई परठ उहाँ कहली ।
लैङिक समनता नइहुइलेसे समाज बराबरी नइहुइठ, समाज मजा नइहुइठ, मनै–मनैमे भेदभाव कैना गलट बाट हो, यी मेरिक सचेटीकरण हुइना जरुरी बा । समाजमे रहल गलट अभ्याससे समाजहे घाटा ओ जोखिम पर्ना ओरसे यिहीहे चिरना आवश्यक रहल उहाँ बटैली ।
कार्यक्रममे धनगढी उपमहानगरपालिका वडा नम्बर ३ के अध्यक्ष बलबहादुर ऐर कोरोना अवधीमे अपनेहुक्रे मास्क, सेनिटाइजर, पन्जा बनैना तालिम देहल बटैलै । उहाँ कहलै, हम्रे एक दिनमे एक दिनमे एक ठो मास्क बडल्ठी । ओकर बजार मोल १० रुप्या परठ, मने अपनही बनाइल मास्क ३ रुप्या केल रहल ओरसे बचत करे सेक्ना बटैलै ।
कार्यक्रमके बारे जानकरी डेटी वुमन एक्टके टिम लिडर प्रकाश अधिकारी कैलालीके तीन नगरपालिकाके ६ सय ५० जनहन टमान मेरिक तालिमके व्यवस्था करल बटैलै । ओस्टकेक करके तालिम पश्चात व्यवसाय संचालन करक लाग आर्थिक सहयोगफे डेहल उहाँ बटैलै । अस्टे कार्यक्रम काभ्रे जिल्लामे करटी रहल उहाँ जनैलै । उदघाटन कार्यक्रम वुमन एक्टके कार्यकारी अध्यक्ष सिर्जना अधिकारीके अध्यक्षतामे हुइल रहे । उहाँ राजनितिक मुद्दा संगे आर्थिक सशक्तिकरणके मुद्दा उठान करे पर्नामे जोड डेहल रहिट ।
कार्यक्रमके संचालन वुमन एक्टके कैलाली जिल्ला संयोजक सरिता चौधरी करले रहिट । धनगढी, गोदावरी ओ गौरीगंगा नगरपालिकाके १९ जाने सहभागी रहल प्रशिक्षक प्रशिक्षण कार्यक्रममे लैङिकता, लैङिक हिंसा, अन्तरवर्गियता, लैङिक शक्तिके सम्बन्धके रुपान्तरण, हानिकारक सामाजिक मुल्य ओ मान्यता, महिलाहुकनके आर्थिक सशक्तिकरण ओ नेतृत्व विकास सम्बन्धके तालिम जेटी रहल बा । तालिममे मन्जु अधिकारी, मन्जु केसी, सिर्जना अधिकारी प्रशिक्षण डेटी रहल बटै ।
