चेतनशिल सहकारीके १६औं साधारण सभा
सागर कुस्मी
हसुलिया, २० भदौ । चेतनशिल महिला विकास बहुउद्देश्यीय सहकारी संस्था लिमिटेडके १६ औं साधारण सभा उसरल बा ।
कैलाली जिल्लाके कैलारी गाउँपालिका वडा नम्वर ५ पवेरामे रहल चेतनशिल महिला विकास बहुउद्देश्यीय सहकारी संस्था लिमिटेडके सोम्मरके रोज पवेरामे एक कार्यक्रम साथ १६औं साधारण सभा निप्टल हो ।
कार्यक्रममे वडका पहुना रहल कैलारी गाउँपालिकाके सामाजिक विकास अधिकृत यगम कलेल अब्बेक समयमे गाउँ घरमे महिला ओइने सहकारी से अपन दैनिक गुजारा चलैना सहज हुइल बटैलैं । उहाँ कलैं– ‘सहकारीसे हमार समाज चलल बा । ओहेमारे एक सहकारी एक उद्योग हुइ पर्ना जरुरी बा । सहकारीहे आघे बर्हैनामे शेयर सदस्य ओइनके ढेर भुमिका बा ।’
ओस्टेके विशिस्ट पहुना वडा नम्बर ५ के वडा अध्यक्ष विष्णु चौधरी आब पुरुष किल नाही महिला ओइने फेन अपन समाजके लाग जागरुक ओ चेतनशिल हुइटी गैल बटैलै । उहाँ कहलैं–‘सहकारी बुढेसकालके साहारा बन्टी रहल बाट बटैलैं । यी सहकारीमे आवद्ध होके काम कर्टी आइल उत्कृष्ट ऋण सदस्य नोखी चौधरीहे, उत्कृष्ट व्यावसायी पवित्रा परियार, ओ गोबरैला गाउँक् समूहके सदस्य ओइन उत्कृष्ट सदस्य सम्मान फेन कैगैल रहे ।
ओस्टेके सदस्य एलिसा चौधरी गाउँघरमे स्थापना हुइल इ सहकारी स्थानीय महिलनके दैनिक जीवनमे धेर सहयोग मिलल बटैली । कोषाध्यक्ष कृष्णा चौधरी २७ जहसे सुरु करल बटैली । आब अइना दिनमे व्यावसायिक रुपमे सहकारीहे हाँके पर्ना उहाँ बटैली । ओस्टेके सहकारीके सदस्य हिरा चौधरी कलि अब्बेसम इ सहकारी धेर प्रगती हुइल बटैली ।
सहकारीके अध्यक्ष हिरा चौधरीके घरगोसियाइमे हुइल कार्यक्रममे उपाध्यक्ष सुशिला चौधरी स्वागत मन्तव्य डेले रहिंट । सचिव कृष्णादेवी चौधरी २०७८÷०७९ के ३,५५, २१, १४४ बराबरके आय व्यय प्रस्तुत कैले रहिंट कलेसे, लेखा परिक्षण प्रतिवेदन व्यवस्थापक बनिता चौधरी प्रस्तुत कैले रहिंट । २०६३ सालमे स्थापना हुइल इ सहकारी यहाँसम पुगेबेर हजारौं उतारचढाव पार कर्टी अब्बेसम ७८३ जाने महिला शेयर सदस्य बटैं ।
कार्यक्रममे कैलारी गाउँपालिका महिला तथा बालबालिका शाखाके प्रमुख बालकुमारी चौधरी, पारदर्शी महिला विकास बहुउद्देश्यीय सहकारी संस्थाके अध्यक्ष गीता चौधरी, कैलारी गाउँपालिका वडा नम्बर ५ के जनप्रतिनिधि ओइनके फेन सहभागी रहल रहे । कार्यक्रम संचालन सह व्यवस्थापक तिर्थ चौधरी कैले रहिंट । इहे अवसर मे जनचेतना मुलक सडक नाटक फेन डेखागैल रहे ।
