विपद व्यवस्थापनके लाग विषयगत क्षेत्र बनाके काम करटिः मन्त्री डा. रावल
पहुरा समाचारदाता
धनगढी, २१ भदौ । सुदूरपश्चिम प्रदेशके आन्तरिक मामिला तथा कानूनमन्त्री डा. रणबहादुर रावल प्रदेशमे विपद व्यवस्थापनके लाग विषयगत क्षेत्र बनाके काम करटि रहल बटैले बटैं ।
सुदूरपश्चिम प्रदेश आन्तरिक मामिला तथा कानून मन्त्रालयके आयोजनामे मंगरके रोज धनगढीमे हुइल सुदूरपश्चिम प्रदेशके परिदृश्यः भूकम्पमे आधारित प्रभाव आकलन कार्यशाला गोष्ठीके उद्घाटन करटि कानूनमन्त्री रावल विपद न्यूनीकरणके लाग सक्कु सरोकारवाला निकाय टीम बनाके लागे परना बटैले रहैं । उहाँ विपदके बारेमे सक्कु निकाय गम्भीर होके लागे परनामे जोड डेहल रहिट ।
उहाँ कलैं, “विपद व्यवस्थापनके लाग प्रदेश सरकारलगायत सक्कु निकाय नयाँ ढंगसे कार्ययोजना बनाके आघे बह्रे सेकेपरल ।” उहाँ सुदूरपश्चिम फेन भूकम्पीय जोखिमके रहल ओरसे पूर्वतयारीमे लागेपरना बटैलैं ।
कार्यक्रममे भूगर्भविद् डा. दीपक चौलगाई भूकम्पीय जोखिम न्यूनीकरणके लाग आपतकालीन, मध्यमकालीन तथा दीर्घकालीन कार्ययोजना बनाके कार्यान्वयन करेपरना बटैलैं ।
सुदूरपश्चिम प्रदेश तथा धनगढी उपमहानगरपालिकाके परिदृश्य भूकम्पमे आधारित प्रभाव आकलनसम्बन्धी कार्यपत्र प्रस्तुत करटि भूगर्भविद् चौलगाई जोखिम संवेदनशील भूउपयोग योजना तर्जुमा, जोखिम प्रतिकार्यके लाग समुदाय तथा सुरक्षा निकायके क्षमता अभिबृद्धि, विद्यालयस्तरमे कम्तीमे फेन वर्षके २ चो कृत्रिम अभ्यास करेपरना बटैलैं । उहाँके अनुसार नेपालके भौगोलिक अवस्था, कमजोर भूबनोट, सक्रिय दरार, उच्च वर्षा, जलवायु परिवर्तन तथा वनजंगल फडानी, अव्यवस्थित शहरीकरण, बिना इञ्जिनियरिङ तथा भौगर्भिक अध्ययन नैकैके जथाभावी विकास निर्माण होके प्राकृतिक प्रकोप बह्रल हो ।
कार्यक्रममे आन्तरिक मामिला तथा कानून मन्त्रालयके उपसचिव विश्वदीप वेस्रा सुदूरपश्चिममे सबसे ढेर बाढीपहिरोके जोखिम रहल जानकारी करैले रहैं । प्रदेशमे विपद व्यवस्थापनके अवस्थाबारे जानकारी करैटि यी प्रदेशमे बाढ ओ डुवानके जोखिम ढेर रहल बटैलैं । उहाँ विपद जोखिम न्यूनीकरण तथा व्यवस्थापनसम्बन्धी नीतिगत तथा कानूनी व्यवस्थाबारे फेन जानकारी करैले रहैं ।
ओस्टेके, जिल्ला प्रशासन कार्यालय प्रशासकीय अधिकृत शिवराज जोशी जिल्लामे हुइना विपदमे जिल्ला प्रशासन कार्यालय स्थानीय तह, रेडक्रमलगायतके संस्थासँग समन्वय कैके काम करटि रहल बटैलैं । कार्यक्रममे धनगढी उपमहानगरपालिकाके विपद शाखा प्रमुख लेखनाथ ओझा विपद व्यवस्थापनके लाग नीतिगत कार्यविधि बनाके धनगढी उपमहानगरपालिका काम करटि रहल जानकारी करैलैं ।
धनगढी उपमहानगरपालिकासे विपद व्यवस्थापनमे करल प्रयासके बारे जानकारी करैटि उहाँ स्थानीय आपतकालीन कार्यसंचालन केन्द्र बनाके काम करटि रहल बटैलैं ।
कार्यक्रममे धनगढी उपमहानगरपालिकाके उपप्रमुख कन्दकला राना विपद व्यवस्थापनके पूर्वतयारी करेपरना बटैलैं । उहाँ उद्धार करेबेर सबहे लक्षित कैके वितरण करे परना बटैलैं ।
ओस्टेके, यूएनसीआरओके तेजमाया डंगोल विपदके बेला महिला तथा बालबालिकाहे यौन शोषण तथा दुव्र्यवहार हुइनासे संरक्षण करेपरना बटैलि । कार्यक्रममे नेपाल रेडक्रम सोसाइटीके लोकराज जोशी, मनिषराज तिमिल्सिना, चेतन साउँद, कृष्ण चौधरीलगायत मन्तव्य व्यक्त करले रहैं । प्रदेश आन्तरिक मामिला तथा कानून मन्त्रालयके सचिव गगन ढकालके अध्यक्षतामे हुइल कार्यक्रममे स्वागत मन्त्रालयके विष्णुदत्त अवस्थी करले रहैं ।
कार्यक्रम नेपाल रेडक्रम सोसाइटी, यूएनडीपी, यूएन वमेन, यूएनसीआरओ, धनगढी उपमहानगनरपालिकाके सहकार्यमे हुइल रहे ।
