होमस्टे व्यवस्थापन तथा क्षमता अभिवृद्धि तालिम
पहुरा समाचारदाता
सुखड, २२ भदौ । कैलालीके घोडाघोडी नगरपालिका–४, माघीमे होमस्टे व्यवस्थापन तथा क्षमता अभिवृद्धि सम्बन्धी ५ दिने तालिम सुरु हुइल बा ।
घोडाघोडी नगरपालिका, युएनडिपी ओ सेवक नेपालके संयुक्त साझेदारीमे सञ्चालित हरित उत्थानशीलता तथा समावेशी कोभिड १९ प्रतिकार्य परियोजना मार्फत तालिम सुरु हुइल हो ।
तालिमके उद्घाटन कैटी युएनडिपी, सुदूरपश्चिम प्रदेशके संयोजक बैजन्ती गिरी सिंह तालिमसे ढिउर चीजके बारेम जानकारी डेना बटैली । जिविको पार्जनके माध्यमहे बह्राइक लाग तालिमके आयोजना करल उहाँ बटैली । आन्तरिक तथा बाह्य पर्यटकहे होमस्टेमे भित्र्याइक लाग तालिमसे टेवा पुग्ना फेन बटैली ।
सेवक नेपालके अध्यक्ष पवन कुमारी भण्डारी समुदायमे सञ्चालनमे हुइल होमस्टेहे मजा बनैना ओ पर्यटकहे आकर्षक करक लाग तालिम आयोजना करल बटाइल रहिट । तालिममे व्यवस्थापनसे लेके सक्कु समुदाय लाभान्वित हुइना बारे समेत जानकारी करैना उहाँ बटैलै । वडा नम्बर १ के वडा अध्यक्ष तथा नगर प्रवक्ता घनश्याम ओझा कोरोनासे पर्यटन क्षेत्र प्रभावित हुइल अवस्थामे यकर पुर्नरुत्थानसंगे हुइल तालिमसे होमस्टे व्यवसाय बह्रैनामे सहयोग पुग्ना बटाइल रहिट ।
होमस्टेहे खैना बैठ्ना ओ रमाइलो कैना ठाउँ किल नैहोके पर्यटन आकर्षण कैना भौतिक पूर्वाधार निर्माण ओ प्रचार प्रसार करे पर्ना उहाँ बटाइल रहिट ।
तालिममे माघी होमस्टे ओ कठरिया होमस्टेके २५ जाने महिला तथा पुरुषके सहभागिता रहल बा । तालिममे अपेक्षा संकलन तथा उद्देश्य बारे छलफल, होमस्टेमे ग्राहक पहिचान, व्यवसायीक योजना, कार्य योजना, होमस्टे बजार तथा बजारीकरण, प्रवर्द्धन तथा प्रवर्द्धनके माध्यम, वर्तमान अवस्थाके विश्लेषण लगायतके विषयमे सहभागीहे प्रशिक्षण कराजैना बटाइल बा । तालिमके प्रशिक्षण भीमबहादुर विष्ट करटी रहल बाटै ।
