सीमा तथा दोदा नदि प्रभावित खाद्य अधिकार समुहसे छलफल

पहुरा समाचारदाता
कञ्चनपुर, २३ भदौ । कञ्चनपुर जिल्लाके पुनर्वास नगरपालिका–७ परासनमे गठन हुइल सीमा तथा दोदा नदि प्रभावित खाद्य अधिकार समुहसे विफेक रोज छलफल कैगिल बा ।

फियान नेपाल सुदूरपश्चिम प्रदेश कार्यालयके आयोजना तथा राष्ट्रिय मानव अधिकार आयोग प्रदेश कार्यालयके समन्वयमे सीमा तथा दोदा नदि प्रभावित खाद्य अधिकार समुहसे छलफल कैगिल हो । फियान नेपालके प्रदेश संयोजक मुकुन्द राना छलफल कार्यक्रमके सहजीकरण करटी पुनर्वास नगरपालिका–७ परासनबासी दोदा लडियाके कारण भोग्टी आइल समस्याबारे जानकारी डेहल रहिट ।

छलफल कार्यक्रममे समुह अध्यक्ष रामबहादुर राना, सचिव बनवारी राना अपनेहुक्रे दोदा लडियासंगे भारतकु दुधुवा नेशनल पार्कसे अइना जंगली जनावरसेफे पीडित हुइल बटैलै । कार्यक्रममे राष्ट्रिय मानव अधिकार आयोग सूदूरपश्चिम प्रदेश प्रमुख मोहनदेव जोशी दोदा लडियाके कारण परासनबासीके खाद्य अधिकार हनन हुइल बटैलै ।

कार्यक्रममे पुनर्वास नगरपालिकाके योजना अधिकृत शंकर बोगटी पालिकाके क्षेत्राधिकारमे पर्ना समस्या समाधान कैना बटैलै । उहाँ दोदा लडियामे तटबन्धनके लाग १ करोड ३० लाख रुप्या विनियोजन हुइल बटैलै । कार्यक्रममे नेपाल पत्रकार महासंघ कैलालीके सचिव प्रेम चौधरी बाढपीडितहुकनके मालपोतमे छुट कैनाके साथे कृषिमे थप प्याकेजके व्यवस्था करे सेक्ना सुझाव डेहल रहिट । कार्यक्रममे पुनर्वास नगरपालिकाके प्रमुख प्रशासकीय अधिकृत गगनसिंह ऐरीलगायत दोदा नदि प्रभावित खाद्य अधिकार समुह हुकनके सहभागिता रहे ।