मध्यपूर्वके उत्कृष्ट विश्वविद्यालयके प्राध्यापक एसपीए कलेजमे पह्रैना

पहुरा समाचारदाता
धनगढी,२४ भदौ । मध्यपूर्व क्षेत्रके उत्कृष्ट विश्वविद्यालयके प्राध्यापक म्याट रोनाल्ड्स(म्याथु) धनगढीके सुदूरपश्चिमाञ्चल एकेडेमी(एसपीए) कलेजमे पह्रैना हुइल बटै ।

मध्यपूर्व क्षेत्रके विश्वविद्यालयमन्से हाल उत्कृष्ट ३ भिटर रहल किंङ फहद यूनिभर्सिटीके प्राध्यापक म्याथु एसपीएमे १ वर्ष अध्यापन करैना हुइल हुइट । म्याथु तीन विषयमे डिग्री हासिल करल हुइट । उहाँसंग १५ देशमे अध्यापान कराइल अनुभवफे बा । शिक्षामे अन्तर्राष्ट्रिय रुपमे विकास हुइल ट्रेण्डहुकनहे आत्मसात करटी एसपीएसे विद्यार्थीनहे अन्तर्राष्ट्रियस्तरके शिक्षा उपलब्ध करैना अष्ट्रेलियन नागरिक म्याथुहे धनगढीमे भित्र्याइल क्याम्पस प्रमुख योगराज उपाध्याय बटैलै ।

‘एसपीएके विद्यार्थीहुकनहे ग्लोबल सिटिजन्स बनैना हमार उदेश्य हो,’ क्याम्पस प्रमुख उपाध्याय कहलै, ‘विद्यार्थीके सर्वाङगिण विकासके लाग उत्कृष्ट विश्वविद्यालयके प्राध्यापक, १५ देशमे अध्यापनके अनुभव सँगाल सेकल व्यक्तित्वहे हम्रे निम्त्यइले बटी । उहाँके माध्यमसे फरक सांस्कृतिक अन्तरघुलन तथा और देशके ट्रेड, संघर्ष ओ जीवन हमार विद्यार्थी बुझ्न लक्ष्य राखल बटी ।’ ५३ वर्षीय म्याथु टमान विश्वविद्यालयके लाग अंग्रेजी कार्यक्रमके समेत करले बटै । एसपीएमे विधार्थीहुकनहे अंग्रेजी भाषा, कला, साहित्य, संस्कृति तथा अनुभव आदानप्रदान करही ।

उ बाहेक उहाँ अष्ट्रेलियामे टमान क्रिकेट टोलीहेफे प्रशिक्षण कैनाके साथे बास्केटबलके रेफ्रीके भूमिका समेत निर्वाह करल रहिट । उहाँ एसपीएके पुरुष तथा महिलाके क्रिकेट टोली ओ बास्केटबल टोली बनैनाफे सहयोग करही । म्याथुसे नेपालके पश्चिमी भागमे रहल सुन्दर नगरी धनगढीमे आइपाके खुशी व्यक्त करटी अपनसंग रहल सक्कु अनुभव एसपीएके विधार्थीहुकनहे देना प्रतिबद्धता जनैलै ।

‘महीहे एसपीए कलेजसे निम्त्यइटी यहाँके विधार्थीहुकनसंग अपन ज्ञान, अनुभव बँटना अवसर डेहल बा । एसपीए कलेजहे धन्यवाद डेहे चाहटु,’ म्याथु कहलै, ‘संसार जित्न शिक्षासे हो । शिक्षा बाँटे मै नेपालके फे पश्चिमी भुभागमे आई पाके खुशी महसुस करले बटु ।’ यी आघे मध्यपूर्वमे काम करेबेर नेपालीसंगे दक्षिण एसियाके नागरिकहुकनके भोटेके अनुभव सुनैटी म्याथुसे आइने प्रायः क्लिनर्स, गार्डनर जैसिन सामान्य काम करल डेखल ओ खराब व्यवहार भोग्टी रहल बटै ।

‘यी गलत ओ असमान व्यवहार हो, मने संसार ओस्टे बा । विदेशमे और विकसित देशके नागरिकसरह नेपालीहेफे व्यवहार होए कहे चाहठु,’ म्याथु कहलै, ‘ओकर लाग शिक्षा अपरिहार्य बा । नेपालीहुक्रे मजा शिक्षा हासिल करटी डिग्री प्राप्त करिट कना मोर इच्छा बा । ओम्ने मै सहयोगीके भूमिका हुइम ।’

म्याथुसे विद्यार्थीहुकनहे एकदम कडा मिहिनेत कैना, विश्वविद्यालयके डिग्री हासिल कैना ओ अपन कम्फर्ट जोनसे बाहेर निक्रना सुझाव डेलै । उहाँ विश्वविद्यालयके शिक्षामे केल सीमित नइहुके विधार्थीहुक्रे मानविय सेवामे तथा वातावरण संरक्षणमे लैजाई पर्नामे जोड डेलै ।

एसपीए कलेजसे अपन विद्यार्थीहे अन्तर्राष्ट्रिय एक्सोजर डेना उदेश्य यी आघेफे टमान देशके अथिति प्राध्यापक, मोटिभेसनल स्पिकरहुकनहे निन्त्यइटी आइल बा । यी आघे एसपीएमे अष्ट्रेलियाके अंग्रेजी भाषाके अध्यापक अमान्डेना भेगाउ, भारतके शौरभ गुप्ता, वरिष्ठ साहित्यकार तथा प्राज्ञ तुलसी दिवस, एनसेलके सीसीओ प्रदीप श्रीवास्तव, कलाकार तथा अध्यापक सन्दीप क्षेत्री आदि आके विद्यार्थीहुकनसंग अन्तरक्रिया करले बटै ।