नुक्लीपुर महोत्सव तथा होमस्टे उदघाटन पुस २५ गतेसे
पहुरा समाचारदाता
धनगढी,१६ पुस । कैलालीके गौरीगंगा नगरपालिका–१० मे यिहे पुस २५ से २९ गतेसम नुक्लीपुर महोत्सव तथा होमस्टे उदघाटन हुइना बा ।
नुक्लीपुर सामुदायिक होमस्टे व्यवस्थापन समितिसे शनिच्चर धनगढीमे पत्रकार सम्मेलनके आयोजना करके नुक्लीपुर महोत्सव तथा होमस्टे उदघाटन कार्यक्रमबारे जानकारी डेहल हो । भाषाकला संस्कृति, जैविक विविधता संरक्षण ओ पर्यापर्यटन प्रवद्र्धन करि’ कना मुल नाराके साथ पहिल चो होमस्टे गाउँ नुक्लिपुर महोत्सव २०७९ आयोजना करल समितिके सदस्य दिनेश दहितथारु जानकारी डेलै ।
होमस्टेके प्रचारप्रसार, मौलिक हस्ताकलाके प्रवद्र्धनके लाग महोत्सवके आयोजना करल नुक्लीपुर सामुदायिक होमस्टे व्यवस्थापन समितिके अध्यक्ष भागीराम चौधरी पत्रकार सम्मेलनमे जानकारी डेलै ।
महोत्सवमे रमाइलो मेला, थारु खानपानके सुविधा, हस्ताकला प्रदर्शनी तथा विक्री वितरण, खुला पुरुष फुटवल प्रतियोगिता, चर्चित थारु कलाकारहुकनके प्रस्तुती, थारु गुरुवा शक्ती प्रदर्शन, डलवमे जंगल सफारीके कार्यक्रम रहल आयोजक समितिके मिडिया संयोजक दहित बटैलै ।
२०७७ सालमे होमस्टे स्थापना लगटे कोरोना महामारी सुरु हुइलपाछे नुक्लीपुर सामुदायिक होमस्टेके विधिवत उदघाटन हुई नइसेकल हो । आयोजनासे महोत्सवसंगे होमस्टेके उदघाटन कार्यक्रमफे धरले बा । नुक्लीपुरमे हाल ६ घरमे होमस्टे संचालनके लाग तयारी करल बा ।
