मुख्यमन्त्री भट्टसे सिटी स्क्यान सेवाके उद्घाटन
पहुरा समाचारदाता
धनगढी, १७ पुस । सुदूरपश्चिम प्रदेशके मुख्यमन्त्री त्रीलोचन भट्ट धनगढीमे रहल सेती प्रादेशिक अस्पतालमे सिटी स्क्यान सेवाके उद्घाटन करले बाटै । अँट्वराके एक कार्यक्रमके बिच मुख्यमन्त्री भट्ट सिटी स्क्यानके उद्घाटन करल हुइट । अस्पतालसे इहे पुस १३ गतेसे सिटी स्क्यान मार्फत सेवा सुरु कैलेसे फेन अँट्वारके उद्घाटन हुइल हो ।
प्रदेश सरकारके विनियोजन बजेटसे अस्पतालमे मेशिन जडान करल हो । सेतीमे सिटी स्क्यान सेवा नैहोके बिरामीहे महँगो शुल्क तिरके निजी अस्पतालमे जाइ पर्र्ना बाध्यता रहल रहे । आब उ समस्या हट्ना विश्वास व्यक्त करल बा ।
सेती प्रादेशिक अस्पतालके मेडिकल सुपरिटेन्डेन्ट डा. हेमराज पाण्डे अस्पतालमे विगत लम्मा समयके संघर्षपाछे सिटी स्क्यान सेवा सञ्चालनमे आइल जानकारी डेलै । मस्तिष्क घातलगायत मस्तिष्क भिट्टरके अन्य चोट, नशामे रगत जमल, घाँटीके समस्या, हड्डीके समस्या, पेटके समस्यालगायत सक्कु मेरके जटिल रोगके निदानमे सिटी स्क्यान मेसिन उपयोगी हुइना करठ् ।
अस्पताल व्यवस्थापन समितिके अध्यक्ष निर्मल शाह जनशक्ति अभावसे सिटी स्क्यान मेसिन सञ्चालनमे ढिलाई हुइल बटाइल रहिट । सेती प्रादेशिक अस्पतालमे सिटी स्क्यान मेशिन शुरु हुइलपाछे बाहरसे आधा मुल्यमे चेकजाँच करे पैना उहाँ बटैलै । ओकरस साथे उहाँ सिटी स्क्यान मेसिनके बाहर अन्य अस्पताके तुलनामे ढेर क्षमताके रहल बटैलै ।
