सुदूरपश्चिम प्रदेशके मुख्यमन्त्रीमे रावल नियुक्त

पहुरा समाचारदाता
धनगढी, २७ पुस । सुदूरपश्चिम प्रदेशके मुख्यमन्त्रीमे राजेन्द्र सिंह रावल नियुक्त हुइल बाटै । २९ सांसदके समर्थन सहित बुधके साँझ दाबी पेश करलसँगे प्रदेश प्रमुख देवराज जोशी रावलहे सुदूरपश्चिम प्रदेशके मुख्यमन्त्रीमे नियुक्त करल हुइट ।

रावल एमालेसँगे माओवादी केन्द्र ओ नागरिक उन्मुक्ति ओ राप्रपा सहित २९ सांसदके समर्थन सहित मुख्यमन्त्रीमे नियुक्त हुइल हुइट । ५३ सदस्यीय प्रदेश सभामे सरकार बनाइक लाग २७ संसद आवश्यक परठ् । जेम्ने मुख्यमन्त्री रावल एमालेके १०, माओवादी केन्द्रके ११ ओ नागरिक उन्मुक्ति पार्टीके ७ ओ राप्रपा १ सांसद सहित २९ जनहनके सहमतिमे मुख्यमन्त्रीमे रावल नियुक्त हुइल हुइट ।

२९ सांसद सहित रावल सुदूरपश्चिम प्रदेशके मुख्यमन्त्रीमे दाबी पेश करल लगत्ते प्रदेश प्रमुख जोशी रावलहे मुख्यमन्त्रीके प्रमाण पत्र प्रदान करल रहिट । आब रावल प्रदेश सभामे विश्वासके मत प्राप्त करे पर्ना रहल बा ।
केन्द्रमे सुदूरपश्चिम सरकारके नेतृत्व एमाले ओ माओवादी पालिक पाला कैना सहमति हुइल रहे । उहे सहमति अनुसार एमाले मुख्यमन्त्री दाबी करेबर सभामुख माओवादीके भाग परल बा । माओवादीके भागमे परल सभामुखमे भिम बहादुर भण्डारी उम्मेदवारी दर्ता करसेकल बाटै । ओ नेपाली कांग्रेससे फेन सभामुखमे मान बहादुर रावल उम्मेदवारी दर्ता करले बाटै ।