कैलारीसे माघ टिहुवारके चार दिन विदा

पहुरा समाचारदाता
हसुलिया, २८ पुस । कैलालीके कैलारी गाउँपालिकासे माघ टिहुवारके अवसरमे चार दिन विदा डेना निर्णय करले बा ।

विफेक रोज गाउँपालिकाके आर्थिक बर्ष २०७९÷०८० सालके पहिल हिउँदे अधिवेशनसे प्रस्ताव पारित करटी पुस ३० गतेसे माघ ३ गतेसमके लाग विदा डेना निर्णय हुइल गाउँपालिका अध्यक्ष राजसमझ चौधरी बटैलै ।

उहाँ कहलै, कैलारी गाउँपालिका ९५ प्रतिशत थारु समुदायके बासोबास रहल बाहुल क्षेत्र हो । थारु समुदायके माघ टिहुवार टिहुवार पुष महिनाके अन्तिम रोजसे सुरु हुजाइठ । टबमारे पुष ३० गतेसे माघ ३ गतेसम कार्यपालिकासे विदा डेना निर्णय करल हो ।’

माघ टिहुवार थारु समुदायके सबसे भारी महत्व बोकल टिहुवार हो । जेम्ने थारु समुदायके लौवा अध्याय (थारु सम्बवत)फे सुरु हुइना करठ । अब्बे थारु सम्वत २६४५ चल्टी रहल बा कलेसे माघसे २६४६ सुरु हुई । १ गते माघ टिहुवार मानलपाछे २ गतेसे बरस भर कैना योजना निर्माण, लोकतान्त्रिक पद्धतीसे भल्मन्सा चयन कैना, घरमुलीके जिम्मा लगैना, घर छुटना, खेतीवारी, बेठवेगारी, भोजविहाके निर्णयफे कैना करजाइठ ।

कैलारी गाउँपालिका माघ टिहुवारके चार विदा करेलेसेफे थारु बाहुल स्थानीय पालिका धनगढी उपमहानगरपालिका, भजनी नगरपालिका, जोशीपुर गाउँपालिका, जानकी गाउँपालिका, टीकापुर नगरपालिका, वर्दगोरिया गाउँपालिका, लम्कीचुहा नगरपालिका, गोदावरी नगरपालिका, गौरीगंगा नगरपालिका ओ घोडाघोडी नगरपालिका माघ टिहुवारके कै दिन विदा करठ कना हेर्ना बाँकी बा । पहिले–पहिले माघ महिनासे कमैया, कमलरी लगैना करजाए । अब्बे कमैया, कमलरी मुक्त हुसेकल बटै ।