जेष्ठ नागरिक ओ अपाङता रहल व्यक्तिनहे कम्मल वितररण
पहुरा समाचारदाता
हसुलिया, २९ पुस । कैलालीके कैलारी गाउँपालिकासे जेष्ठ नागरिक, अपाङता हुइल व्यक्ति ओ लैङिक हिंसा प्रभावितहुकनहे कम्मल वितरण करले बा ।
कैलारी गाउँपालिका महिला तथा बालबालिका शाखाके आयोजनामे जार महिनामे ओहर्ना कम्मल वितरण करल हो । गाउँपालिका अध्यक्ष राजसमझ चौधरीके वडका पहुनामे जेष्ठ नागरिक, अपाङता हुइल व्यक्ति ओ लैङिक हिंसा प्रभावितहुकनहे कम्मल वितरण करल हो । गरम कम्मल वितरण करटी उहाँ जारसे बचाइक लाग उहाँहुकनहे कम्मल वितरण करल बटैलै ।
कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी, पहुनामे वडा नम्बर गाउँपालिकाके प्रवक्ता तथा वडा नम्बर ७ वडा अध्यक्ष दिपेन्द्रबहादुर बम, वडा नम्बर ६ के अध्यक्ष प्रेम बहादुर चौधरी, वडा नम्बर ३ के अध्यक्ष सन्तराम चौधरी, वडा नम्बर ४ के अध्यक्ष ठागुराम चौधरी, दिपेन्द्र माविके प्रअ विनोद भट्टराई लगायतसे जेष्ठ नागरिक, अपाङता हुइल व्यक्ति ओ लैङिक हिंसा प्रभावितहुकनहे कम्मल हस्तान्तरण करल रहिट ।
कार्यक्रमके संचालन कैलारी गाउँपालिका महिला तथा बालबालिका शाखाके प्रमुख बालकुमारी चौधरी करले रहिट । सक्कु वडा कार्यालयसे छनौट हुके आइल ५५ जाने जेष्ठ नागरिक, अपाङता हुइल व्यक्ति ओ लैङिक हिंसा प्रभावितहुकनहे जेष्ठ नागरिक, अपाङता व्यक्ति सम्मान ओ लैङिक हिंसामे प्रभावितहुकनके लाग सहायता कार्यक्रम अन्र्तगत कम्मल हस्तान्तरण करल उहाँ बटैली ।
