योजना तर्जुमा तथा प्रस्तावना सम्बन्धी अभिमुखीकरण कार्यक्रम

पहुरा समाचारदाता
हसुलिया, ३० पुस । कैलालीके कैलारी गाउँपालिकामे योजना तर्जुमा तथा प्रस्तावना सम्बन्धी दुई दिने अभिमुखीकरण कार्यक्रम सम्पन्न हुइल बा ।

अष्ट्रेलियन एडके आर्थिक सहयोगमे दिगो विकास समाज भजनी ओ वल्र्ड भिजनके संयूक्त साझेदारीमे अगुवा कृषक, कृषक सन्जाल, महिला उद्यमीहुकनके लाग योजना तर्जुमा तथा प्रस्तावना सम्बन्धी तालिमके आयोजना करले रहे । विफेक रोजसे सुरु हुइल तालिम समापन कार्यक्रम गाउँपालिका उपाध्यक्ष भगवती कुमारी चौधरीके वडका पहुनामे हुइल रहे । कार्यक्रममे बोल्टी उहाँ, कृषकहुकनके लाग गाउँपालिकासे टमान कार्यक्रम लागु करल बटैली । पालिकासे चैते धान, बसन्ते मकै खेतीमे अनुदान कार्यक्रम, सिचाई सुविधाके कृषि मिटर व्यवस्था करटी रहलफे उहाँ बटैली ।

कार्यक्रममे गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्र बहादुर बम कृषकके हरेक समस्या समाधान कैनामे पालिकाके कमी नइरख्ना बटैलै । उहाँ अगुवा कृषक, कृषक सन्जाल, महिला उद्यमीहुकनहे पालिकासे समन्वय कैना आग्रहफे करलै । कार्यक्रममे दिगो विकास समाज भजनीके परियोजना संयोजक रतन विक कृषकहुकन प्रस्तावना, कागजातके प्रक्रिया, व्यावसयिक योजना, योजना छनौट प्रक्रियाबारे जानकारी डेहक लाग कार्यक्रमके आयोजना करल बटैलै ।

दुई दिनसम चलल कार्यक्रममे कैलारी गाउँपालिकाके सामाजिक विकास शाखा प्रमुख यगम कलेल, कृषि शाखाके हेमराज ढुङगना लगागतसे सहजीकरण करल रहिट । तालिम समापन कार्यक्रममे सहभागीके ओरससे राजकुमार चौधरीफे मन्तव्य व्यक्त करल रहिट । कार्यक्रम कृषक सन्जालके उपसंयोजक विसराम चौधरीके अध्ययक्षतामे समापन हुइल रहे । कार्यक्रमके संचालन दिगो विकास समाजके सहजकर्ता रमला चौधरी करल रहिट । तालिममे २८ जाने अगुवा कृषक, कृषक सन्जाल, महिला उद्यमीहुकनके सहभागिता रहे ।

ओस्टेक गौरीगंगा नगरपालिका, घोडाघोडी नगरपालिका, टीकापुर नगरपालिका ओ भजनी नगरपालिकामे योजना तर्जुमा तथा प्रस्तावना सम्बन्धी दुई दिने अभिमुखीकरण कार्यक्रम हुसेकल दिगो विकास समाजके सहजकर्ता रमला चौधरी बटैली ।