विद्यालयमे संचालित टोल कक्षाके अनुगमन
पहुरा समाचारदाता
हसुलिया, ३० पुस । युएस एडके आर्थिक सहयोगमे युनिसेफके समन्वयमे निडस नेपालसे कैलारी गाउँपालिकामे संचालित शिक्षामे कोभिड प्रतिकार्य क्रियाकलापके अनुगमन कैगिल बा ।
शुकके रोज कैलारी गाउँपालिकाके दिपेन्द्र मावि ओ छिमानन्द आधारभूत विद्यालयमे जनप्रतिनिधि, कर्मचारी, निडस नेपालके कार्यसमिति ओ सरोकारवाला निकायसे शिक्षामे कोभिड प्रतिकार्य परियोजनासे कैगिल क्रियाकलापके अनुगमन कैगिल हो । अनुगमन कार्यक्रममे गाउँपालिका अध्यक्ष राजसमझ चौधरी सरकारी विद्यालयमे विद्यार्थीनके संख्या घटटी गैल बटैलै । युएस एडके आर्थिक सहयोगमे युनिसेफके समन्वयमे निडस नेपालसे कैलारी गाउँपालिकामे संचालित शिक्षामे कोभिड प्रतिकार्य क्रियाकलापसे विद्यार्थीनके सिकाई बृद्धि हुइल बटै ।
सरकारी विद्यालयमे विद्यार्थीनके संख्या न्यून हुइटी बा । यी खतराके घण्टी हो,’ अध्यक्ष कहलै, ‘सरकारी विद्यालयमे विद्यार्थीनके आर्कषण बह्राइक लाग शिक्षकहुकनसे ढेर मेहनत कैना जरुरी बा । काल्हके दिनमे विद्यार्थी हेरैना कहल, विद्यालय हेरैना हो । शिक्षक हेरैना हो ।’ सरकारी विद्यालयमे शिक्षाके गुणस्तर बृद्धि करेक पालिकासे सदा लागलफे उहाँ बटैलै ।
अनुगमन कार्यक्रममे गाउँपालिका उपाध्यक्ष भगवतीकुमारी चौधरी शिक्षामे कोभिड प्रतिकार्य परियोजनासे सिकाईमे बृद्धि हुइल बटैटी । संस्थाके कार्यक्रम ओरैलेसेफे पालिकाके निरन्तरता डेना जरुरी रहल बटैली । उहाँ कहली, शिक्षकहुक्रे मजा करटी गैलेसे विद्यार्थीनके भविष्य बन्नाके साथे सरकारी विद्यालयमे विद्यार्थीनके संख्याफे बृद्धि हुई ।’ तोल कक्षा संचालन हुइलपाछे विद्यार्थीनके पह्रना ओ लिख्ना बानीके विकास हुइल बटैली । विद्यार्थीनहे किताव रटाके सिखैनासेफे टमान मेरिक शैक्षिक समाग्रीके प्रयोग करलेसे सिख्ना ओ बुझनामे सहयोग पुग्ना उहाँ बटैली ।
निडस नेपालके परियोजना संयोजक करन बानियाँ कैलारी गाउँपालिकाके ९ वडामे एक सय २२ ठो तोल कक्षा संचालन करल बटैलै । विद्यार्थीनके पठन ओ लेखन बानीके विकास करेक लाग टयावलेट ओ ब्लुटुथके प्रयोगसहिट अध्यापनके व्यवस्था करल उहाँ बटैलै । परियोजनाके म्याद ओराई लागल ओरसे उपलब्ध कैगिल सामाग्रीके प्रयोग ओ शिक्षण उपलब्धीबारे अनुगमन हुइल उहाँ बटैलै ।
गाउँपालिकाके प्रमुख प्रशासकीय अधिकृत विरबहादुर ऐर कोभिडके बेला पह्राईसे बन्चित हुइल ढेर विद्यार्थी कुलत ओ गलत संगतमे फसल बटैलै । पह्रना उमेरके बालबालिका लागु औषध दुव्र्यसनीमे फस्टी रहल ओरसे तोल कक्षा संचालन आवश्यक रहलफे उहाँ बटैलै ।
अनुगमनमे शिक्षा शाखा प्रमुख गणेश प्रसाद मिश्र, निडस नेपालके उपाध्यक्ष धनबहादुर कुश्मी, वडा–१ के अध्यक्ष धोजहरिपाल बोहरा, महिला तथा बालबालिका शाखा प्रमुख बालकुमारी चौधरी, शिक्षा अनुगमन समिति संयोजक विनोद भट्टराई, निडस नेपालके फिल्ड सुपरभाइजर पुष्पराज उपाध्याय, कैलारी गाउँपालिका अध्यक्ष, उपाध्यक्षके स्वकीय सचिव जितेन्द चौधरी, कृष्ण चौधरीलगायतके सहभागिता रहे । कैलारी गाउँपालिकाके ९ वडामे संचालन हुइल एक सय २२ ठो तोल कक्षामे टमान साामग्री सहित टयावलेट ओ ब्लुटुथके प्रयोगसे अध्यापन हुइटी रहल बा ।
