सुर्खेतमे थारुहुक्रे मनैलै माघ महोत्सव

पहुरा समाचारदाता
सुर्खेत, ३ माघ । थारु समुदायके लौव बरस ओ वडका टिहुवार माघ पर्वके अवसरममे वीरेन्द्रनगर ९ तिलपुरमे माघ महोत्सव मानगिल बा ।

लखागिन थारु उत्थान मञ्च, सुर्खेतके मूल आयोजना ओ राष्ट्रिय थारु कलाकार मञ्च, अर्गानिक सामुदायिक होमस्टे तिलपुरके सहआयोजनामे पुस २९ ओ ३० गते दुई दिनसम माघके महत्वबारे प्रशिक्षण, मघौटा नाच प्रतियोगिता एवम् ढुमरु गीतके सांगितिक रात्री सांस्कृृतिक नाचगान करके माघ महोत्व कार्यक्रम कैगिल बा ।

कार्यक्रममे माघी पर्वके महत्व एवम् मौलिकताके बारेमे नयाँ पुस्ताहे पत्ता नइहुके संस्कृतिप्रति सद्भाव हेरैटी गैल ओरसे यी बार यी पर्वके महत्व बारे प्रशिक्षण, मघौटा नाँच प्रतियोगिता ओ पुसके अन्तिम दिन गैना ढुमरु गीतके रात्री माघ सांगितिक प्रस्तुतिसहित कार्यक्रम मनाइल बाट लखागिन थारु उत्थान मञ्च सुर्खेतके अध्यक्ष मानबहादुर पन्ना बटैलै । उहाँ माघ थारुहुकनके विशेष पर्व हुइल ओरसे कर्णाली प्रदेशके वीरेन्द्रनगरमे केल बसोबास रहल थारुहुकनहे स्थानीय तहके सरकारसे थारु समुदायके कर्मचारी, शिक्षक, विद्यार्थीहुकनहे दुई दिनसम बिदा डेहे पर्ना मागफे करलै । लुम्बिनी ओ सुदूरपश्चिम प्रदेशमे हरेक वर्ष थारुहुकनहे दुई दिनसम सार्वजनिक बिदा डेटी रहेबेर सुर्खेती थारुहुक्रे अन्यायमे परल गुनासो करलै ।

पुस २९ गते करल प्रशिक्षण कार्यक्रममे माघी पर्वके महत्वके बारेमे कार्यपत्र थारु संस्कृतिविद एवम् साहित्यकार मानबहादुर चौधरी पन्ना प्रस्तुत करल रहिट । कार्यपत्रमे थारुहुकनके महान पर्व माघी मनैना विधि तौरतरिका, समुदायमे यरक महत्व ओ वर्तमान टमान संस्कृतिके प्रभावके चुनौेती ओ नयाँ पुस्तासे अपन संस्कृतिहे आत्मसात करे पर्ना लगायतके विषय उठान करल रहे ।

कार्यक्रमके वडका पहुना एवम् सुर्खेत वीरन्द्रनगर नगरपालिकाके नगरप्रमुख मोहनमाया ढकाल नेपाल विविधतामे एकता रहल देश हो । थारु समुदाय नेपालके केल नाही सुर्खेत उपत्यकाकेफे मूल आदिवासी हुइट । थारुहुकनके ऐतिहासिक चाड माघमे सक्कु गाउँसे जम्मा हुके मनैना कामसे संस्कृति संरक्षणमे महत्वपूर्ण योगदान पुग्न बटैलै । यैसिन रचनात्मक कार्यक्रमसेफे थारु संस्कृति संरक्षणमे टेवा पुग्न हुइल ओरसे यिहीहे अभिन व्यापक ओ बृहत करटी जाई पर्ना बटैलै । संस्कृति देशके पहिचान ओ चिनारी हुइल ओरसे थारु समुदायके लाग नगरपालिकासे हुइना सक्कु मेरके सहयोग हुइना बाट व्यक्त करलै ।

कार्यक्रमके् विशिष्ट पहुना वीरेन्द्रनगर नगरपालिकाके उपप्रमुख निलकण्ठ खनाल थारु समुदायके कला संस्कृति संरक्षणके लाग सक्कु नगरपालिकासे अइना दिनमे थारुहुकनके मौलिक संस्कृति माघ पर्वके लाग हरेक वर्ष निश्चित बजेट विनियोजन करके सहयोग कैना प्रतिवद्धता जनैलै । कला संस्कृतिमा धनी रहल थारु समुदायके पहिचान धरोहर माघी पर्वफे हो । यिहीहे बचैना जिम्मा सरकारसे दायित्व बोध कैना जिकिर करलै ।

कोष तथा लेखा नियन्त्रण कार्यालय जुम्लाके प्रमुख जागुराम चौधरीसे सुर्खेतके थारुहुकनके भाषा संस्कृति संरक्षण सम्वद्र्धन कैना थारु समुदाय अपनहीफे जागरुक हुई पर्नामे जोड डेलै । आब राजनीतिमेफे आघे बह्रै पर्ना ओ सदस्यमे केल नाही वडा अध्यक्ष, नगर प्रमुख उपप्रमुखमे समेत फड्को मर्ना सुझाव डेलै । युवाहे पुराना पुर्खाहुक्रे सिकाई पर्ना ओ युवाहुक्रे फे अपन संस्कार संस्कृतिहे माया करटी जर्गेना करे पर्नामे जोड डेलै । युवाहुक्रे आबके बदल्टी परिवेशमे सांस्कृतिक रुपान्तरण कैना जरुरी हुइलेसे मौलिकताहे भुलाई नइहुइनामे जोड डेलै ।

कार्यक्रममे थारु कल्याणकारिणी सभाके केन्द्रीय सदस्य कृष्ण बहादुर थारु, थाकसके जिल्ला सभापति बेचुलाल चौधरी, थारु वुद्धिजीवि लालबहादुर चौधरी, मानबिर थारु, अमर चौधरी, शेरबहादुर थारु लगायतके वक्ताहुक्रे माघीके शुभकामना व्यक्त करटी थारुहुकने मौलिक पहिचान बचैना सक्कु साथ डेहे पर्नामे जोर डेहल रहिट ।

कार्यक्रममे लखागिन उत्थान मञ्चके उपाध्यक्ष लोकबहादुर चौधरी स्वागत मन्तव्य करल रहिट । मघौटा नाच प्रतियोगितामे वीनपा ९,तिलपुर गाउँ प्रथम, वीनपा २, कोलडाँडा नयावस्तीका द्धितीय,वीनपा १०, पदमपुरके तृतीय ओ वीनपा ३ तातापानीके चौठा सान्त्वना स्थान प्राप्त करले रहिट । प्रतियोगीहुकनहे पुरस्कार तथा प्रमाण पत्र कार्यक्रमके सभाध्यक्ष मानबहादुर चौधरी पन्नाकरले रहिट ।

माघ महोत्वस कार्यक्रममे स्थानीय निर्वाचनमे निर्वाचित सदस्य रमेश चौधरी, सरिता चौधरी, लक्ष्मी चौधरी ओ मानबहादुर चौधरीहे हार्दिक बधाइ तथा सम्मान करल बाट सचिव जीतबहादुर चौधरी बटैलै । ओस्टेक करके थारु समुदायमे भाषा, कला, संस्कृतिमा विशेष योगदान पुगैना वीनपा २, कोलडाँडाके मानबिर थारु, ठौरीके टेकबहादुर चौधरी, फलाँटेके कालिका चौधरी ओ वीनपा १०, बुदबुदीके बिन्दु चौधरीहे सम्मान करल रहे ।

कार्यक्रममे टमान थारु कलाकारहुकनके थारु नृत्य तथा गीतफे प्रस्तुत करल रहे । कार्यक्रमके सञ्चालन लखागिन थारु उत्थान मञ्च सुर्खेतके सचिव जीतबहादुर चौधरी ओ मानकुमारी चौधरी करल रहित ।