कला संस्कृति पुनःजागरणके लाग माघ मिलन कार्यक्रम

पहुरा समाचारदाता
हसुलिया, १९ माघ । पुर्खनके सिखाइकले कला संस्कृतिहे पुनःजागरण कराइक लाग कैलालीके कैलारी–४ ‘के’ गाउँमे माघी मिलन कार्यक्रम कैगिल बा ।

कैलारी गाउँपालिकाके आर्थिक सहयोग ओ वडा नम्बर ४ के आयोजनामे माघी मिलन कार्यक्रमके आयोजना कैगिल हो । माघी मिलन कार्यक्रमके वडका पहुना कैलारी गाउँपालिकाके योजना शाखा प्रमुख सन्तोषकुमार चौधरी रहल रहिट । कार्यक्रममे सम्बोधन करटी उहाँ माघी थारु समुदाय लौवा बरसके रुपमे मनैटी आइल ।

विगतके दिनमे हमार पुर्खाहुक्रे बहुट ढेर कला, संस्कृतिके विकास करले रहिट’, उहाँ कहलै, ‘मने अब्बेक पिढी बाहेरके संस्कृतिहे अंगालल ओ अपन संस्कृतिहे भुलैटी गैल बटै । यी विकृति फैल्टी गैलेसे दुई–तीन दशकपाछे पुर्खनके सिखाइल संस्कृति लोप हुजाई ।’ सांस्कृतिक कार्यक्रम होए वा जनचेतना जगाके हुइलेसेफे पुरान संस्कृति यूवा पुस्तामे हस्तान्तरण कैना जरुरी रहल उहाँ बटैलै ।

थारु समुदायसे मनोरन्जनके लाग प्रयोग कैना डफला, मन्डरा, मजिरा, मौसम अनुसार गैना गीत सजना, मागर, धमार, वरकीमार, नाँचजैना सखिया, झुमरा, मघौटा, मुङगहवा नाँच, महिला पुरुषसे लगाजैना पोशाक गरगहनाफे गरगहना लोप हुइटी गैल ओरसे संरक्षणमे यूवा पुस्ता अग्रसर हुइना योजना शाखाके प्रमुख बटैलै ।

कैलारी गाउँपालिका–४ के वडा स्तरीय भल्मन्सा संयोजक जगलाल चौधरी आजके दिनमके पुर्खनके सिखाइल पुरान कला, संस्कृति संरक्षण करे नइसेक्लेसे पहिचान ओ अस्तित्व गुम्ना बटैलै । थारु समुदायके परम्परासे चल्टी आइल भल्मन्सा प्रथाके कानूनी मान्यता आवश्यक रहल कहटी भल्मन्साहुक्रे राजनितिक क्षेत्रसे दुर रहे पर्ना उहाँ आग्रह करलै ।

गोल्डेन यूवा क्लवके अध्यक्ष विपतराम चौधरी पहिले पहिले डसिया डेवारीमे सक्कु टोलमे नाँचगान हुइना मने अब्बे सुनसान हुइल बटैलै । पुरान लोककलाहे संरक्षण करे नइसेक्लेसे पाछे पिढी हमार संस्कृति, परम्परा का हो कुछ नइजैना उहाँ बटैलै । कार्यक्रममे जनकल्याण माविके प्रअ एचएम चौधरी, वडा सदस्य लालबहादुर विक लगायत मन्तव्य व्यक्त करले रहिट ।

वडा नम्बर ४ के वडा अध्यक्ष ठागुराम चौधरीके अध्यक्षतामे हुइल कार्यक्रममे कविता ओ धमार गैले रहिट । कार्यक्रममे स्वागत मन्तव्य करटी वडा सदस्य मोहनलाल चौधरी लक्षित वर्ग कार्यक्रम अन्र्तगत वडामे रहल कला, संस्कृतिहे पुनःजागरण करेक लाग माघी मिलन कार्यक्रमके आयोजना करल बटैलै ।

कार्यक्रम असिना टोलमे भल्मन्सा दासीराम चौधरी धमार, भूपू भल्मन्सा जुगराम चौधरी वडकीमार, मागर सुनैले रहिट । कार्यक्रममे मघौटा नाँच, झुमरा नाँचलगायत टमान नाँच प्रस्तुत कैगिल बा । कार्यक्रमके संचालन सविता चौधरी ओ विएल चौधरी करले रहिट ।