कैलारी गाउँपालिकासे क्यूआर कोड सेवा सुरु
पहुरा समाचारदाता
हसुलिया, १९ माघ । कैलालीके कैलारी गाउँपालिकासे विद्युत राजश्व संकलन करेक लाग क्यूआर कोड सेवा सुरु करले बा ।
गाउँपालिका अध्यक्ष राजसमझ चौधरीके अध्यक्षतामे विफेक रोज आयोजना कैगिल अन्तरक्रिया कार्यक्रमपाछे क्यूआर कोड सुरु कैगिल हो । कार्यक्रममे बोल्टी गाउँपालिका अध्यक्ष क्यूआर कोड सेवा सुरु हुइलपाछे सेवाग्राही अपने ठाउँमे मोवाइल मार्फतफे राजश्व बुझाई व्यवस्था हुइल बटैलै ।
उहाँ कहलै, कौनो किसानके दुई ठो वडामे जग्गा बा, कलेसे उहीहे पायक पर्नां एक्के ठाउँसे दुनु ठाउँक राजश्व बुझाई सेक्ही । वडामे–वडामे जाई नइपरी झंझटसे मुक्त हुइनाके साथे समयकेफे बचत हुई ।’
गाउँपालिकाके प्रमुख प्रशासकीय अधिकृत विरबहादुर ऐर राजश्व संकलन व्यवस्थित बनाइक लाग क्यूआर कोड सेवा सुरु करल बटैलै । उहाँ कहलै, क्यूआर कोड मार्फत राजश्व बुझैना व्यवस्था सक्कु वडामे यी सेवा सुरु हुइल । अभिनसम राजश्व संकलन नगद रुपमे हुइटी आइल ओरसे यिहीसे कबु कबु रकम हिनामिना हुई सेक्ना ओ, बैंक दाखिला ढिला हुइठ ।’ क्यूआर कोड सेवा सुरु हुइलपाछे सिधा बैंक खातामे जम्मा हुइना प्रमुख प्रशासकीय अधिकृत ऐर बटैलै ।
गाउँपालिकाके सामाजिक विकास अधिकृत यगम कलेल विद्युतिय राजश्व बुझाई क्यूआर कोडके व्यवस्था एक ठो गाउँपालिकाके कार्यालयमे ओ सक्कु वडा कार्यालयमे लागु हुइल बटैलै । उहाँ कहलै, सेवाग्राहीसे आब राजश्व नगद बुझाईफे सेक्ही । मोवाइल मार्फत बुझाई चहुइया क्यूआर कोड स्क्यान कैकेफे राजश्व बुझाई व्यवस्था कैगिल बा ।
कार्यक्रममे गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम, वडा नम्बर २ के वडा अध्यक्ष विकास चौधरी, गाउँपालिकाके कर्मचारी ओ वडा सचिवहुकनके सहभागिता रहे । छलफल कार्यक्रममे एनआइसी एशिया बंंैकके हसुलिया शाखाके प्रवन्धक उमेश पाण्डे सहजीकरण करटी गाउँपालिका अध्यक्ष राजसमझ चौधरीहे क्यूआर कोड हस्तान्तरण करल रहिट ।
