अपांगता हुइल व्यक्तिहुकनके अवस्थाबारे प्रादेशिक परामर्श गोष्ठी
पहुरा समाचारदाता
धनगढी,१९ माघ । राष्ट्रिय मानव अधिकार आयोगके आयोजना ओ राष्ट्रिय आदिवासी जनजाती अपांगता महिला संघ नेपालके सहकार्यमे अपांगता हुइल व्यक्तिहुकनके प्रादेशिक अवस्था, अपांगता हुइल व्यक्तिहुकनके अन्तर्राष्ट्रिय कानूनी प्रावधानके कार्यान्वयन तथा सिआरपिदिके सुझावबारे सेवा प्रदायक निकाय ओ सेवाग्राहीबीचके गहन समिक्षात्मक गोष्ठी सम्पन्न हुइल बा ।
राष्ट्रिय मानव अधिकार आयोग सुदूरपश्चिम प्रदेश प्रमुख हरि ज्ञवालीके अध्यक्षतामे हुइल कार्यक्रममे उहाँ समग्र अपांगता रहल नागरिकके सवाल सम्बन्धी मन्त्री ओ मुख्यमन्त्री समक्ष पुगैना मोर जिम्मेवारी मै पुरा करम कहटी प्रतिबद्धता व्यक्त करलै । सुदूरपश्चिम प्रदेशमे अपांगता मानव अधिकारके अवस्था ओ कानुनी प्रावधानबारे सरोकारवालासंगके नीति सम्बाद कार्यक्रम छलफल हुइल रहे ।
कार्यक्रमके सहभागी अधिकारकर्मी नन्दराज भट्टसे अपांगता समावेशी नीति तर्जुमा कैना यहाँ उठल सक्कु सवाल दस्तावेजीकरण करके सम्बन्धी निकायमे पुगैना राष्ट्रिय मानव अधिकार आयोग सुदूरपश्चिम प्रदेशसे भुमिका खेल्न बटैलै ।
कार्यक्रममे धनगढी उपमहानगरपालिकाके महिला विकास अधिकृत, पत्रकार, बहिरा संघ कैलाली, नेत्रहिन युवा संघ कैलाली, नेपाल अपांग संघ कैलाली लगायत टमान सरकारी गैरसरकारी संघसस्था ओ सरकारी कार्यालयके प्रतिनिधिके सहभागिता रहल रहे ।
