सांसद चौधरी कारागार चलान
पहुरा समाचारदाता
धनगढी,२० माघ । जिल्ला अदालत कैलाली प्रतिनीधी सभा सदस्य अरुणकुमार चौधरीहे जिल्ला करागार चलान करले बा ।
नागरिक उन्मुक्ति पार्टीसे कैलाली क्षेत्र नम्बर २ से विजयीहुइल चौधरीहे जिल्ला प्रहरी कार्यालय कैलाली अदालतमे बुझाइल पाछे उहाँहे कैद पुर्जी डेके जिल्ला कारागार पठाइल हो ।
तेह्र बरस आघे थरुहट आन्दोलनके क्रममे ट्याक्टर जराइल घटनामे कसुरदार ठहर कैटी उहाँहे बाँके कोहलपुरसे पक्राउ करल रहे । काठमाण्डौं जैना क्रममे पक्राउ परल चौधरीहे नेपालगञ्जसे जहाजमे काठमाडौं ओ काठमाडौंसे जहाजमे धनगढी लानल रहे । चौधरीसँग नागरिक उन्मुक्ति पार्टीके अध्यक्ष एवम् सांसद रञ्जिता श्रेष्ठ चौधरी फेन कैलाली आइल बाटी ।
२०६६ सालमे हुइल थरुहट आन्दोलनके क्रममे बन्दके अवज्ञा करल कहटी लु २ त २११ नम्बरके ट्याक्टरमे बन्दकर्ता आगजनी करल रहे । ट्याक्टरमे आगजनी करल कहटी ट्याक्टर धनी साबिकके बलिया–५ के महादेव बजगाईँ २०६७ भदौ ५ मे चौधरीसहित तीन जाने विरुद्ध किटानी जाहेरी डेहल रहिट ।
प्रतिवादीके अनुपस्थितिमे २०७० वैशाख १० गते अदालतसे फैसला करल रहे । अदालतसे साबिकके बलिया गाविस–३ के अरुणकुमार चौधरी, उहे ठाउँके परशुराम चौधरी ओ कोटातुल्सीपुर गाविस–१ वीरबहादुर चौधरीहे जनही छ महिना कैद सजायसहित आठ लाख १९ हजार ४२३ रुपियाँ बिगो तिरे पर्र्ना फैसला सुनाइल रहे ।
१० बरस आघे नै अदालतले फैसला कैलेसे फेन चौधरीसहित कसुरदार तीनु जनहनहे पक्राउ नैके फरार सूचीमे राखल रहे । इहे बिचमे चौधरी कैयौँचो चुनावसमेत लरसेकल बाटै । गैल अगहनमे सम्पन्न निर्वाचनमे उहाँ कैलाली–२ से नागरिक उन्मुक्ति पार्टीसे प्रतिनिधि सभा सदस्यमे विजयी हुइल रहिट ।
नागरिक उन्मुक्ति पार्टीसे ११ बरस आघे नै सरकार ओ तत्कालीन आन्दोरत थरुहट सङ्घर्ष समितिबिच हुइल सहमति विपरीत मुद्दा चलाके पक्राउ करल जनैले बा ।
टमान माग रख्टी चरणबद्ध आन्दोलन कैटी आइल थारु संयुक्त सङ्घर्ष समिति ओ नेपाल सरकारबिच २०६९ जेठ १० गते १० बुँदे सहमति हुइल रहे । जौन सहमतिके बुँदा ८ मे थारुहुक्रनसे चरणबद्ध रूपमे करल आन्दोलनके क्रममे पक्राउ परलहे निशर्त रिहा कैना, आन्दोलनके क्रममे लगाइल सक्कु मुद्दा फिर्ता लेना ओ आन्दोलन रोक्न सहमति करल रहे । नेपाल सरकारके वार्ता टोली ओ थारु संयुक्त सङ्घर्ष समितिबिच हुइल सम्झौता विपरित मुद्दा चलाके दोषी ठहर कैके पक्राउ कैना कार्यके थरुहट÷थारुवान् राष्ट्रिय मोर्चा ओ थारु कल्याणकारिणी सभा कैलाली विरोध जनैले बाटै ।
२०७२ साल भदौ ८ गते थारु समुदायके घर, व्यापारिक फर्म छान–छान जरुइयाहे पक्राउसमेत नैकरल मने सरकार ओ आन्दोलनरत पक्षबिच मुद्दा फिर्ता कैना सहमति हुइल घटनामे दोषी ठहर कैके पक्राउ कैना थारुनउपर राज्यके विभेद रहल मोर्चा ओ सभाके ठहर रहल बा ।
