शैक्षिक गुणस्तर वृद्धि ओ नीजि स्रोतके शिक्षक व्यवस्थापन अभियान जारी
पहुरा समाचारदाता
धनगढी, २० माघ । सामुदायिक विद्यालयमे डेखल समस्या लेके धनगढी उपमहानगरमे सुरु हुइल अभियान जारी रहल बा ।
अभियान अन्र्तगत शुकके धनगढी उपमहानगरपालिका वडा नम्बर ५, ६ ओ ११ वडामे ध्यानकर्षण सहितके ज्ञापनपत्र बुझाइल हो । धनगढीके वडा नम्बर १७ से सामुदायिक विद्यालयके शैक्षिक गुणस्तर वृद्धि ओ निजी स्रोत शिक्षकके व्यवस्थापन अभियान सुरु हुइल रहे । सामुदायिक विद्यालके शैक्षिक वृद्धि ओ नीजि स्रोत शिक्षकके व्यवस्थापन अभियानके संयोजक एंव वडा नम्बर १७ मे रहल न्यू कालिका आधारभूत विद्यालय धुर्झन्नाके विद्यालय व्यवस्थापन समितिके अध्यक्ष पुष्पराज राना नेतृत्वमे वडा अध्यक्षहुकनहे ज्ञापनपत्र बुझाइल हो ।
शुकके धनगढी–६ के वडा अध्यक्ष भागीराम चौधरीसे ज्ञापनपत्र बुझटी नगर शिक्षकके लाग परिषद विशेष माग रख्न प्रतिबद्धता करलै । उहाँ उपमहानगरपालिकामे स्थायी शिक्षकहुक्रे लापरवाही करटी रहल बटैलै । ‘कक्षामे स्थायी शिक्षकसेफे नीजि स्रोतके शिक्षकसे मेहनत करटी रहल बटै, उहाँ कहलै । ‘अइना शैक्षक सत्रसे नीजि शिक्षकहे व्यवस्थापनके लाग नगरसे विशेष पहल कैना विश्वासत रहल बटु ।’ उहाँ शिक्षक समेत जिम्मेवार बने पर्ना बटैलै ।
स्थानीय सरकारके प्राथमिकतामे शिक्षा नइपरकेफे समस्या हुइल सामुदायिक विद्यालके शैक्षिक वृद्धि ओ नीजि स्रोत शिक्षकके व्यवस्थापन अभियानके संयोजक एंव न्यू कालिका आधारभूत विद्यालय धुर्झन्नाके विद्यालय व्यवस्थापन समितिके अध्यक्ष पुष्पराज राना बटैलै ।
‘स्थानीय सरकारसे चहलेसे ढेर बाट सुधार करे सेक्ठै, उहाँ कहलै ‘मने, स्थानीय सरकारके ध्यान शैक्षिक क्षेत्रके सुधारसे ढेर पूर्वाधार विकास डेखगिल ।’ शिक्षा क्षेत्रके समस्या सुरुमे वडा तहहे ध्यानकर्षण करैटी रहल उहाँक कहाई बा । संयोजक रानाके अनुसार हालसम ५,६,७, ११, १४, १५, १६, १७, १८ ओ १९ वडामे वडा अध्यक्षहुकनहे ध्यानकर्षण करासेकल बा । उपमहानगरके बाँकी और वडामे समेत कुछ दिनमे ज्ञापनपत्र बुझैना कार्यक्रम रहल बा ।
वडा पालिकाहे बुझाइल ज्ञापनपत्रमे विद्यालयमे एक कक्षा एक शिक्षकके दरबन्दीके व्यवस्था हुई पर्ना, वडामे विनियोजन हुइल रकमके २० प्रतिशत बजेट शिक्षामे छुट्याई पर्ना माग करले बटै ।
विद्यालय सञ्चालनमे समस्या हुइल कहटी ओइने वडा शिक्षा समितिहे क्रियाशिल बनाके वडा शिक्षा कार्यविधि तयार करे पर्ना, वडासे निकासी हुइना नदीजन्य पदार्थके कुल रकमके २५ प्रतिशत विद्यालय विकासमे खर्च करे पर्ना, नीजि स्रोतमे कार्यरत शिक्षकहे नगर शिक्षकके रुपमे व्यवस्थापन करे पर्ना लगायतके माग आघे सरले बटै ।
ओस्टेक करके, करके सामुदायिक विद्यालयमे कक्षा एक से ५ सम अंग्रेजी माध्याममे बढैना वातावारण सिर्जना करे पर्ना, बाल विकास शिक्षकहे तालिमके व्यवस्था करे पर्ना ओ तालिम लेहल शिक्षकहुकनहे शैक्षिक गुणस्तर वृद्धिके निमित्त पुर्न ताजगी तालिमके व्यवस्था मिलाइ पर्ना लगायतके माग रहल बा । ओस्टेक करके सरकारी संघ संस्थामे कार्यरत कर्मचारी ओ विद्यालय व्यवस्थापन समितिके अध्यक्षहुकनके बालबालिकाहे सामुदायिक विद्यालयमे अध्यनन करैना वातावरण बनाई पर्ना रहल बा । ओस्टेक टमान ठाउँमे विद्यालयके नाममे रहल सम्पति कौनो व्यक्ति या संस्थासे प्रयोग करल हुइलेसे विद्यालयहे हस्तान्तरण कैना व्यवस्था मिलैनता ओ सामुदायिक विद्यालयके शैक्षिक पात्रो जारी करे पर्ना माग करल बा ।
ओस्टेक करके एक वडा एक नमुना विद्यालयके घोषणा करे पर्ना विद्यालयके व्यवस्थापन समिति गठनमे मनोनयन कैना सदस्यह संघीय ऐन अनुसार मनोनयन करे पर्ना रहल बा । अभियान संयोजक पुुष्पराज रानाके अनुसार यी समस्यामे उपमहानगर भिटर रहल सक्र्कु विद्यालय व्यवस्थापन समिति संग छलफल हुई । नगरमे सब वडामे ज्ञापनपत्र बुझा सेकलपाछे उपमहानगर प्रमुखहे बुझैना कार्यक्रम रहल बा ।
