फागुन १८ गतसेसे घोडाघोडी महोत्सव
पहुरा समाचारदाता
सुखड, २४ माघ । कैलालीके घोडाघोडी नगरपालिका–१, सुखडमे घोडाघोडी महोत्सव २०७९ हुइना हुइल बा ।
मंगरके पत्रकार सम्मेलन मार्फत महोत्सव बारे जानकारी करागिल हो । घोडाघोडी उद्योग वाणिज्य संघके आयोजनामे महोत्सव हुइना हो । “कला सांस्कृतिक कृषि, पर्यटन ओ व्यापार, समृद्ध घोडाघोडी विकासके आधार” कना नारा सहित अइना फागुन १८ गतेसे २८ गतेसम सुखडके हेलि प्याडमे महोत्सव हुइना जनाइल बा ।
विश्व रामसार सूचिमे पर्ना सफल पर्यटकीय क्षेत्रके रुपमे रहल घोडाघोडी टल्वाके प्रचारप्रसारके लाग महोत्सव आयोजना करे लागल घोडाघोडी उद्योग वाणिज्य संघके अध्यक्ष दुर्गा दत्त जोशी बटैलै । महोत्सवसे हुइल आम्दानीसे उद्योग वाणिज्य संघके भवन निर्माणके साथे इ क्षेत्रके सामाजिक विकासमे सहयोग कैना लक्ष्य रहल उहाँ बटैलै । महोत्सव अवधिभर स्थानीय तथा राष्ट्रिय कलाकारके समेत प्रस्तुति रहना जनाइल बा ।
महोत्सवमे इ क्षेत्रके सांस्कृतिक भेषभुषा झल्कना स्थानीय कला संस्कृतिके पर्दशन कैनाके साथे व्यापारिक, व्यावसायिक ओ कृर्षि स्टल समेत रहना समितिके महासचिव भवानी प्रसाद ढकाल जानकारी डेलै ।
महोत्सवसे स्थानीय कला सांस्कृतिकके जगेर्नामे टेवा पुग्ना, स्थानीय उत्पादनहे बजारमुखी बनाके बजारसम सहज पहुँचके व्यवस्था, स्थानीय स्तरमे रहल टमान जात जातिहुक्रनके कला संस्कृतिके पहिचान कैके प्रर्वधनमे समेत टेवा पुग्ना विश्वास लेहल बा ।
१० दिनसम सञ्चालन हुइना महोत्सवमे करिब २५/३० लाख खर्च हुइना अनुमान करल आयोजक जनैले बा । महोत्सव अवलोकनके लाग विद्यार्थीके लाग ५० ओ अन्य सर्वसाधारणके लाग ८० रुपैयााके टिकट दररेट कायम करल आयोजक जनैले बा ।
