गेटा मेडिकल कलेज देशके नमुना स्वास्थ्य विश्वविद्यालय बनीः प्रम प्रचण्ड

पहुरा समाचारदाता
धनगढी, १ फागुन । प्रधानमन्त्री पुष्पकमल दाहाल ‘प्रचण्ड’ शहिद दशरथ चन्द राष्ट्रिय स्वास्थ्य विज्ञान विश्वविद्यालय देशके नमुना स्वास्थ्य विश्व विद्यालय बनैना बटैले बाटै ।

कैलालीस्थित शहिद दशरथ चन्द स्वास्थ विज्ञान विश्वविद्यालय (गेटा) मेडिकल कलेजके सोम्मारके स्थलगत निरीक्षण करे पुगल प्रधानमन्त्री दाहाल देशके नमुना विश्वविद्यालय बनैना बटाइल हुइट ।

प्रधानमन्त्रीमे नियुक्त हुइलपाछे प्रधानमन्त्री दाहाल सोम्मारके पहिलचो सुदूरपश्चिम प्रदेश पुगल हुइट । उहाँ स्थलगत निरिक्षण कैटी अपने पहिलेसे नै प्रस्तावित मेडिकल कलेजसंग जोरल बटैलै । उहाँ इ क्षेत्रमे सक्कु नागरिकके माग बमोजिम सरकारसे निर्णय समेत हुइल बटैटी सञ्चालन फेन हाली हुइना बटैलै । प्रधानमन्त्री दाहल विकासे योजनाके निरीक्षण पहिले फेन सुदूरपश्चिमसे करल ओ अब्बे फेन अपने अनुगमन एहोरसे शुरु करल बटैलै ।

दाहाल कहलै “इ मेडिकल कलेज चलैना ओर फेन तिब्र गतिमे आघे बह्रब । विश्वविद्यालय स्थापना प्रक्रिया फेन आघे बह्रसेकल बा, इ क्षेत्रके सक्कु जनप्रतिनिधि, राजनीतिक दलके प्रतिनिधि, विज्ञलगायत संग छलफल कैके विश्वविद्यालय बनैना निर्णय करल हुइटी ।”

उहाँ गेटामे मेडिकल कलेज स्थापना कैना क्रमसे नै अपने इहीसे प्रत्यक्ष रुपमे जोरल बटैलै । ‘पहिला मेडिकल कलेज स्थापना कैना क्रममे मै प्रत्यक्ष रुपमे जोरल रहु । यकर बेस बन्टी रहल बेला फेन मै यकर अनुगमन करले रहुँ’ उहाँ कहलै ‘इ बेर फेनसे अनुगमनमे अइटी रहल बेला मेडिकल कलेज चलैना प्रक्रिया टे आब आघे बह्रल बा नै । इहीहे आघे बह्रैना स्वास्थ्य संग सम्बन्धित दरबन्दीके काम फेन हाली पुरा करब ।’

उहाँ अपने प्रदेश स्तरमे विकास आयोजनाके अनुगमन कैना सुदूरपश्चिमसे सुरु करल बटैलै ।‘महिन सुदूरपश्चिममे पहिलचो प्रधानमन्त्री हुइल बेला कुछ काम करल ओ सबसे ढेरचो सुदूरपश्चिममे आके अवलोकन फेन करल रहुँ’ उहाँ कहलै ‘इ बेर फेन प्रदेश स्तरमे विकास आयोजनाके अनुगमन कैना सुदूरपश्चिमसे हुइल बा ।’

सरकारसे अँट्वारके स्वास्थ्य विज्ञान विश्वविद्यालय बनैना निर्णय करल रहे । प्रधानमन्त्री दाहाल कलेज हाली सञ्चालनके प्रक्रियामे जैना बटाइलपासँगे इ क्षेत्रके नागरिक खुशी हुइल बाटै ।

दाहालसंगे निरीक्षणमे उद्योग, वाणिज्य तथा आपूर्तिमन्त्री दामोदर भण्डारी, स्वास्थ्य तथा जनसंख्यामन्त्री पदम गिरी, मुख्य सचिव शंकरदाश बैरागी लगायत रहल रहिट ।