सामाजिक विकास जरुरीः गाउँपालिका उपाध्यक्ष चौधरी

पहुरा समाचारदाता
हसुलिया, २ फागुन । कैलारी गाउँपालिका वडा नम्बर १ आर्थिक सहयोगमे सामाजिक विकासमा यूवा सक्रियता नेपाल, कैलालीके आयोजनामे महिलाहुकनहे सात दिने चेयर कुसन बनैना तालिम डेगिल बा । माघ २५ गतेसे सुरु हुइल तालिम बुधके रोज सम्पन्न हुइल बा ।

तालिम समापन कार्यक्रमके वडका पहुना कैलारी गाउँपालिकाके उपाध्यक्ष भगवतीकुमारी चौधरी रहल रहिट । कार्यक्रममे बोल्टी उहाँ समाज परिवर्तनके लाग सामाजिक विकास कैना जरुरी रहल बटैली ।

कार्यपालिका बैठकमे भौतिक पूर्वाधारसेफे सामाजिक विकासके लाग आवाज उठैठु’, उहाँ कहली ‘हम्रे महिला पाछे परल बटी । महिलाके लाग आउर ढेर कार्यक्रम नन्ना जरुरी बा ।’ गाउँपालिकासे डेहल १५ लाख बजेटसे सुत्केरी महिलाहुकनके पोषण कार्यक्रम सुरु करल उहाँ बटैली । पहिल चरण वितरण हुसेकल आब फागुनसे फेरसे सुरुवाट हुइना उहाँ जनैली । आत्मनिर्भर नइहुइल महिला अपन गोसिया, डाई बाबासे पैसा मागेरबेर टमान सवल करठै उहाँ कहली, ‘लक्षित बर्ग कार्यक्रम अन्र्तगत वडा नम्बर १ सीप सिखक लाग आर्थिक सहयोग करल यी सीप जिन्गीभर काम लागी । सीप रहलेसे टमान मेरिक आयआर्जन करेसेक्जाई ।’

गाउँपालिका उपाध्यक्ष कहली, ‘अवसर नइपाइल कारण हम्रे महिला परिचयफे डेहे नइसेक्ठी । ओकर लाग हम्रे महिलाहुकनके लाग महिला नेतृत्व क्षमता विकास अभिमुखीकरण तालिमके बजेट विनियोजना करले बटी । तालिमपाछे महिलाहुक्रे अपन समस्याबारे बोलेसेकिट कना हमार उद्देश्य हो ।’

सामाजिक विकासमा यूवा सक्रियता नेपालसे डेहल तालिमसे सीप प्रयोग करलेसे महिलाहुक्रे आय आर्जन करे सेक्ना उहाँ बटैली । महिला तथा बालबालिका शाखाके बजेटसे सिलाई कटाई तालिमके आयोजना हुइना उहाँ बटैली ।

सहर बजारमे आय आर्जनके लाग छोट लगानीसे मजा आम्दानी करल डेखजाइठ उहाँ कहली, ‘आयआर्जन कैना टमान तरिका रहठ । हम्रे अपन बारीमे रहल टिना और जनहनहे बाँटके ओरावाडरठी उहीहे विक्री करे नइजन्ठी । विक्री करे जन्लेसे आयस्रोत बह्राई सेक्ना उहाँ बटैली ।अइना दिनमे महिलाहुकनके टमान मेरिक सीपमुलक तालिमके संचालन कैनाफे प्रतिवद्धताफे जनैली ।

कार्यक्रमके विशिष्ट पहुना कैलारी गाउँपालिका वडा नम्बर १ के वडा अध्यक्ष धोजहरिपाल बोहरा रहिट । कार्यक्रममे बोल्टी यिहे कार्यक्रममे अइना दिनमे प्रथामिकता डेना बटैलै ।

कार्यक्रममे वडा सदस्य लिलापति चौधरी, पत्रकार प्रेम चौधरी, तालिमके प्रशिक्षक मनिता चौधरी, तालिमके सहभागी रिता भुल ओ रिदिमा कुमारी चौधरीलगायत मन्तव्य व्यक्त करल रहिट ।

सामाजिक विकासमा यूवा सक्रियता नेपाल, कैलालीके अध्यक्ष गंगाबहादुर योञ्जनके अध्यक्षतामे हुइल कार्यक्रमके संचालन सामाजिक विकासमा यूवा सक्रियता नेपाल, कैलालीके सहजकर्ता कल्पना पौडेल करल रहिट । कार्यक्रममे कैलारी गाउँपालिका अध्यक्षके स्वकीय सचिव जितेन्द्र चौधरी,सामाजिक विकासमा यूवा सक्रियता नेपाल, कैलालीके सचिव लोकेन्द्र प्रसाद जैसीलगायतके सहभागिता रहल रहे ।

तालिम समापन कार्यक्रममे प्रशिक्षार्थीहुकनसे बनाइल कुसन कार्यक्रममे वडका पहुना, विशिष्ट पहुना, पहुनाहुकनके उपहारफे प्रदान कैगिल बा ।