लोकसेवा आयोगके टिसरा राष्ट्रिय सम्मेलन सुरु

प्रदेशमे ३६ प्रतिशत जनशक्ति खाली

पहुरा समाचारदाता
धनगढी, १९ फागुन । लोकसेवा आयोगके टिसरा राष्ट्रिय सम्मेलन शुकके रोजसे धनगढीमे सुरु हुइल बा ।

‘योग्यता, निष्पक्षता ओ स्वच्छताः लोकसेवा आयोगके प्रतिवद्धता’ कना नारासहित केन्द्रीय लोकसेवा आयोगके आयोजनामे सम्मेलन हुइटा । सम्मेलनके उद्घाटन करटि आयोगके अध्यक्ष माधवप्रसाद रेग्मी प्रदेशमे गठन हुइल लोकसेवा आयोग सावधानी ओ स्तरीय काम कारबाहीमे ध्यान डेहेपरना बटैलैं ।

उहाँ प्रदेश ओ केन्द्रबीच समन्वयात्मक रुपमे काम हुइपरना बटैलैं । उहाँ अब्बे प्रदेश लोकसेवासे ११ औं तहसमके कर्मचारीके बढुवा सिफारिस करना प्रवृतिसे जोखिम निम्त्याइ सेक्ना बटैलैं । उहाँ कलैं, ‘प्रदेश अपन खुशी ११ औं तहके कर्मचारी बढुवा सिफारिस करल डेखाइल बा । अइसिक करलेसे प्रदेशमे बढुवा हुइल संघके सचिवमे दाबी करे सेक्ना डेखाइल । प्रदेश लोकसेवा आयोग ढेर सावधानीपूर्वक काम करेपरना डेखाइल ।’

उहाँ कौनो फेन पदमे विज्ञापन कैके सक्कु प्रदेश एकचो करेपरना सुझाव डेलैं । ‘अब्बे एक प्रदेशसे कौनो कल्स्टरमे विज्ञापन खोलल बा कलेसे अन्य प्रदेशके बासिन्दा फेन आवेदन डेटि बटैं,’ उहाँ कलैं, ‘औरे प्रदेशसे आवेदन डेहल मनै छनौट हुइठैं । प्रदेशमे हाजिर लगैठैं पाछे कुछ दिनमे अपन प्रदेशमे सरुवा लेठैं ।’ उहाँ उ प्रवृतिसे कौनो प्रदेशमे कर्मचारी पदपूर्ति हुइना तथा कौनो प्रदेशमे खाली रहना जोखिम बह्रल कटि कलैं, ‘प्रदेशमे आवश्यक कर्मचारी पदपूर्ति करना बा कलेसे सक्कु प्रदेश एक्के चो विज्ञापन खोलि । अइसिक करलेसे प्रदेशके मनै औरे प्रदेशमे आवेदन नइडिहि ।’ उहाँ लोकसेवा आयोगहे कर्मचारी भर्ना करना संयन्त्र किल नैबनैना अनुरोध करलैं । उहाँ कलैं, ‘केन्द्र प्रदेश लोकसेवा आयोगसंग समन्वय करना हो । प्रदेशहे आवश्यक दक्ष विज्ञ, प्रश्नपत्र निर्माण, आवश्यक उत्तरपुस्तिका तयारी लगायतमे केन्द्र समन्वय करे सेकठ । मने, स्रोत साधन, जनशक्ति व्यवस्थापन अप्नही करि ।’

सुदूरपश्चिम प्रदेशके प्रमुख सचिव नारायणप्रसाद शर्मा दुवाडी संघीय संरचना अनुसार प्रदेश सरकार गठन हुइल पाँच वर्ष पुरा होसेकलमे समेत प्रदेशके मन्त्रालयमे जनशक्ति व्यवस्थापन हुइ नैसेकल बटैलैं । उहाँ प्रदेशमे अभिन ३६ प्रतिशत जनशक्ति रिक्त रहल बटैलैं । उहाँ कलैं, ‘जनशक्ति व्यवस्थापनके लाग माग करलेसे फेन सुनुवाई नैहुइल ।

६४ प्रतिशत जनशक्तिके भरमे प्रदेशके मन्त्रालय सेवा प्रवाह करटा ।” उहाँ प्रदेश सरकार प्रदेश लोकसेवा ओ पदपूर्तिहे प्राथमिकतामे ढैके आघे बह्रल बटैलैं ।

अस्टेक, कार्यक्रममे सुदूरपश्चिम प्रदेश लोकसेवा आयोगके अध्यक्ष यज्ञराज बोहरा यी सम्मेलनसे कानूनीसे फेन व्यवहारिक बाट सिखेक लाग रहल बटैलैं । उहाँक अनुसार सुदूरपश्चिम लोकसेवा आयोग रिक्त पदपूर्तिके लाग अभिनसम १२ ठो विज्ञापन खोल सेक्ले बा । ओम्नेसे तीन सय ८६ जाने सिफारिस होसेकल बटैं कलेसे ९० पदके पूर्तिके लाग प्रक्रियामे बा ।

कार्यक्रममे कर्णाली प्रदेश लोकसेवा आयोगके अध्यक्ष रामप्रसाद उपाध्याय, लुम्बिनी प्रदेश लोकसेवा आयोगके अध्यक्ष तिलाराम भट्टराई, गण्डकी प्रदेश लोकसेवा आयोगके अध्यक्ष विष्णुप्रसाद नेपाल, बागमती प्रदेश लोकसेवा आयोगके अध्यक्ष सुरेशमान श्रेष्ठ, मधेस प्रदेश लोकसेवा आयोगके सदस्य डा. सुजाता देव कोशी प्रदेश लोकसेवा आयोगके अध्यक्ष उत्तमकुमार भट्टराईलगायत मन्तव्य व्यक्त करले रहैं ।

दुई दिनसम चल्ना सम्मेलनमे केन्द्र ओ प्रदेश लोकसेवा आयोगसे टमान कार्यपत्र प्रस्तुत हुइना ओ नयाँ योजनाबारे छलफल कैके निचोड निकरना लोकसेवा आयोगके सूचना अधिकारी देवीप्रसाद सुवेदी जानकारी डेलैं । सम्मेलनके उपलब्धि पत्रकार सम्मेलन कैके सार्वजनिक करना उहाँ बटैलैं ।

आयोगके सदस्य वीरबहादुर राई स्वागत करल कार्यक्रमके सञ्चालन केन्दीय लोकसेवा आयोग कार्यालयके हरिप्रसाद भुषाल करले रहैं ।

यीआघे लोकसेवा आयोगके पहिल राष्ट्रिय सम्मेलन २०७७ सालमे फागुन २३ ओ २४ गते काभ्रेके धुलिखेलमे तथा दोसर राष्ट्रिय सम्मेलन २०७८ फागुन २३ ओ २४ गते रुपन्देहीके भैरहवामे आयोजना करल रहे ।