अन्तर्राष्ट्रिय महिला दिवसके अवसरमे वक्तृत्वकला प्रतियोगिता

पहुरा समाचारदाता
हसुलिया, १९ फागुन । कैलालीके कैलारी गाउँपालिकामे ११३औ अन्तर्राष्ट्रिय महिला दिवसके अवसरमे शुकके रोज हसुलियामे माध्यमिक विद्यालय स्तरीय वक्तृत्वकला प्रतियोगिता हुइल बा ।

कैलारी गाउँपालिका महिला तथा बालबालिका शाखाके आयोजना तथा यी क्षेत्रमे क्रियाशिल सहकारी संस्था, गैर सरकारी संस्थाहुकनके समन्वयमे ‘लैङिक समानताके बलियो अधिकार, सृजनात्मक प्रविधिमे महिला पहुँचके विस्तार’ कना मुल नाराके साथ माध्यमिक विद्यालय स्तरीय वक्तृत्वकला प्रतियोगिता हुइल हो । कैलारी गाउँपालिकाके टमान विद्यालयके २० जाने छात्रा, छात्र वक्तृत्वकला प्रतियोगितामे भाग लेहल रहिट ।

जेम्ने लक्ष्मी माविके पत्रिका ढुङगाना पहिल, राष्ट्रिय माविके प्रिति चौधरी दुसरा ओ दिपेन्द्र माविके रिता चौधरी टिसरा हुइल बटै । प्रतियोगितामे पहिल, दुसरा ओ टिसरा हुइल विद्यार्थीनहे यिहे २४ गते महिला दिवसके अवसरमे पुरस्कृत कैना कैलारी गाउँपालिका महिला तथा बालबालिका शाखाके प्रमुख बालकुमारी चौधरी बटैली ।

प्रतियोगितामे भाग लेहुइया सक्कु विद्यार्थी प्रतिभा मजा रहल कहटी और जनहनमे सन्त्वाना पुरस्कार ओ प्रमणपत्रके व्यवस्था कैना उहाँ बटैली ।

गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे उहाँ विद्यार्थीनके प्रतिभासे हर्षित बनाइल बटैलै । कार्यक्रममे बोल्टी कैलारीके महिला प्रअ रहल विद्यालयहे विशेष अनुदानके व्यवस्था कैना बटैलै ।
लैङिक समानताके लाग छावा छाईहे भेदभाव करे नइहुइना उहाँ बटैलै । एसइइमे मजा अंक नन्ना विद्यार्थीनहे पालिकासे सम्मान कैनाफे उहाँ बटैलै ।

गाउँपालिका उपाध्यक्ष भगवतीकुमारी चौधरी गाउँघरमे नुकल प्रतिभाहे बाहेर नानेक लाग प्रतियोगिताके आयोजना करल बटैली । प्रतियोगिता संचालनपाछे विद्यार्थीनके बोल्न शैलीमे विकास हुइल उहाँ बटैली । आजकाल्हके लउण्डा लउण्डी लागु औधष दुव्र्यशनीमे फस्टी रहल ओर अभिभावक शिक्षकहुक्रे विशेष ध्यान डेहे पर्ना उपाध्यक्ष बटैली ।

कार्यक्रममे कैलारी गाउँपालिका–४ के वडा अध्यक्ष ठागुराम चौधरी, सेतो गुराँस बालविकासके प्रतिनिधि सुरज परियार लगायत मन्तव्य व्यक्त करल रहिट । कार्यक्रमके संचालन कैलारी गाउँपालिका महिला तथा बालबालिका शाखाके प्रमुख बालकुमारी चौधरी करल रहिट । महिला दिवसके अवसरमे उहाँ टमान कार्यक्रमके आयोजना करटी रहल उहाँ बटैली ।
कार्यक्रममे वडा अध्यक्ष, कार्यपालिका सदस्य, विद्यालयके प्रअ तथा प्रतिनिधि ओ विद्यार्थीहुकनके सहभागिता रहे ।