टमान व्यक्तित्व सम्मानित
पहुरा समाचारदाता
धनगढी, २० फागुन । धनगढीस्थित कैलाली जनपुस्तकालयके शनिच्चरके रोज अपन ६६ औं वार्षिकोत्सव ४६ औं साधारण सभा हुइल बा । वार्षिकोत्सव कार्यक्रममे समाजमे महत्वपूर्ण योगदान डहेल टमान व्यक्तित्व सम्मानित हुइल बटैं ।
उ अवसरमे पत्रकार दीपक उपाध्यायहे ‘चित्रबहादुर कार्की राष्ट्रिय समाजसेवा पुरस्कार २०७९’ से सम्मान करल बा । उहाँ लम्मा समयसे पत्रकारितासँगे सामाजिक क्षेत्रमे उल्लेखनीय योगदान पुगाइल कटि उपाध्याय सम्मानित हुइल बटैं । उपाध्याय आजसम एकसय चो रक्तदान कैसेकल बटैं । उपाध्यायहे रक्तदानके विषयहे सामाजिकरण एवम् जागरण करैना कार्यमे उल्लेखनीय भूमिका निर्वाह कैके सयौं व्यक्तिके जीवन रक्षा करना भूमिका खेलल कटि पुरस्कृत करल जनपुस्तकालयके अध्यक्ष डाक्टर टीएन जोशी बटैलैं ।
उसँगे दीनानाथ राष्ट्रिय साहित्य प्रतिभा पुरस्कार महेश बिक्रम शाह (अछाम), पूर्ण–कृष्ण स्मृति राष्ट्रिय साहित्य प्रतिभा पुरस्कार माया ठकुरी (काठमाडौं), साबित्री–कमल राष्ट्रिय लोक संस्कृति पुरस्कार डा. देवेन्द्रप्रसाद भट्टलाई, उदय–दुर्गा साहित्य पुरस्कार हरिश जोशी महेन्द्रनगर ओ हर्ष–पार्वती लोकसंस्कृति पुरस्कार गोविन्दप्रसाद पाण्डेय (नेपालगञ्ज) पुरस्कृत हुइल बटैं ।
अस्टेक, कैलाली जनपुस्तकालय पुरस्कार रामलाल जोशी, तिलोत्तमा स्मृति राष्ट्रिय शैक्षिक साधना पुरस्कार प्रा. बुधराम चौधरी, शिव–बीमा राष्ट्रिय शिक्षा सेवा पुरस्कार प्रा. सुरेन्द्र चन्द, द्वारिकादेवी ठकुरानी स्मृति राष्ट्रिय प्रतिभा पुरस्कार सरस्वती भट्ट (काठमाडौं), शिवबिमा जेहन्दार छात्रवृत्ति धरणीधर भट्ट (डोटी), यज्ञराज यात्री राष्ट्रिय साहित्य प्रतिभा पुरस्कार आचार्य घनश्याम लेखक (कञ्चनपुर)हे प्रदान करल बा ।
अस्टेक, सूर्यप्रसाद विष्णुदेवी राष्ट्रिय साहित्य प्रतिभा पुरस्कार जनक रसिक (डडेल्धुरा), भोजराज हरिप्रिया राष्ट्रिय समाजसेवा पुरस्कार समाजसेवी सीताराम अवस्थी ओ दशरथ चन्द स्म्मृति राष्ट्रिय सम्मान शिक्षासेवी अनिता पन्तहे प्रदान करल अध्यक्ष जोशी बटैलैं ।
अस्टेक जयपृथ्वीबहादुर सिंह स्मृति राष्ट्रिय सम्मान हरिश ओझा, पहलमानसिंह स्वाँर समृति राष्ट्रिय सम्मान प्रा. जगन्नाथ जोशी, परिमल स्नेही राष्ट्रिय लोकनृत्य सम्मान चिनाराम नेपाली (कञ्चनपुर), बद्रीनाथ राष्ट्रिय शिक्षा सेवा सम्मान भूपाल खड्का ओ युवा प्रतिभा राष्ट्रिय सम्मान केपी कलौनी ओ गगन अयडीहे प्रदान करल बा ।
