स्वर्गीय नायक पर्शुरामके सम्झनामे दिप प्रज्वलन
पहुरा समाचारदाता
धनगढी, २१ फागुन । स्वर्गीय नायक पर्शुराम चौधरीके सम्झना अँटवारके रोज धनगढीके गुरही चोकमे श्रद्धाञ्जली कार्यक्रम ओ दिप प्रज्वलन कैगिल बा ।
राष्ट्रिय थारु कलाकार मंच प्रदेश ७ सियस फिल्म प्राली ओ सुदुरपश्चिम कला प्रतिस्थानके आयोजनामे श्रद्धाञ्जली कार्यक्रम ओ दिप प्रज्वलन कैगिल हो । कार्यक्रमके संचालन राष्ट्रिय थारु कलाकार मंच प्रदेश ७ के कोषाध्यक्ष राजु चौधरी (राज) करल रहिट । स्वर्गीय नायक पर्शुराम चौधरीके सम्झनामे कैगिल श्रद्धाञ्जली तथा दिप प्रज्वलन कार्यक्रममे कलाकार, स्थानीय, बुद्धिजीवी, संचारकर्मीहुकनके सहभागिता रहे ।
थारु चलचित्रके निर्माता तथा कलाकार परशुराम चौधरीके ४५ वर्षके उमेरमे युरोपके पोर्चुगलमे निधन हुइल रहे । स्वास्थ्यमे गम्भीर समस्या उत्पन्न हुइलपाछे दुई महिना आघे अस्पताल भर्ना करल चौधरीके उपचारमे क्रममे गैल शुकके मृत्यु हुइल रहे । अस्पतालसे चौधरीके हृदयघातसे मृत्यु हुइल बटैले रहे । चर्चित बृत चित्र कमैयामे चौधरीसे प्रमुख पात्रके रुपमे भूमिका निर्वाह करल रहिट । चौधरीके अभिनय तथा लगानीमे थारु चलचित्र बौछार, जीवन एक लदिया हो लगायतके चलचित्र निर्माण हुइल रहे ।
अन्तर्राष्ट्रिय कराँतेके खेलाडी समेत रहल चौधरी थारु चलचित्रके निर्माण तथा अभिनयसे चर्चामे आइल रहिट ।
धनगढी उपमहानगरपालिका–१ शिवनगरके स्थायी बासिन्दा रहल चौधरी २०११ युरोप गैल रहिट । कुछ वर्ष बेल्जियममे बैठल चौधरी २०१५ से पोर्चुगलमे बैठटी आइल रहिट ।
