सिकलसेल विषेशज्ञ चिकित्सकहुकनके आज क्षेत्रीय सम्मेलन
पहुरा समाचारदाता
धनगढी, २७ फागुन । धनगढीमे आज सिकलसेल एनेमिया सम्बन्धी क्षेत्रीय सम्मेलन हुइना बा । सिकलसेन एनेमियाके क्षेत्रमे नम्मा समय काम करल अनुभवी चिकित्सक ओ नयाँ चिकित्सकसहितके उपस्थितिमे क्षेत्रीय सम्मेलन हुई लागल हो ।
धनगढीके रुवस होटेलमे हुइना सम्मेलनमे धनगढीमे कार्यरत विषेशज्ञ चिकित्सक, नेपालगंज, टिकापुर, महेन्द्रनगर तथा काठमाण्डौँसेफे अइना १६ जाने विषेशज्ञ चिकित्सकसे टमान विषयगत कार्यपत्र प्रस्तुत कैना आयोजक संस्था सोसाइटी अफ मेडिसिन अफ नेपालके केन्द्रिय सदस्य तथा सम्मेलन संयोजक डा.शुवेशराज कायस्थ बटैलै ।
झण्डै ७ सय सदस्य रहल यी संस्था देशभरके चिकित्सकहुकनके सबसे भारी पेशागत संस्था रहल कारणफे यी सम्मेलन आयोजना करे लागल डा.कायस्थ बटैलै । टमान विषयके विषेशज्ञ चिकित्सक ओ लौवा चिकित्सक एक्के ठाउँमे बैठके सिकलसेल एनेमिया सम्बन्धी छलफल तथा विचार मन्थन कैना उहाँ बटैलै । यी सम्मेलनसे सिकलसेल एनेमिया सम्बन्धी रोगके उपचारमे बहुट योगदान डेना उहाँ अपेक्षा रख्ले बटै ।
सुदूरपश्चिम प्रादेशिक स्वास्थ्य निर्देशनालयके तथ्याङक अनुसार सेती अस्पतालमे ८ सय ३६, घोडाघोडी अस्पतालमे ३ सय ६१, टिकापुर अस्पतालमे १ जाने करके कैलालीमे १ हजार १ सय ९८ जाने सिकलसेल एनेमियाके बिरामी फेला परल बटै । कञ्चनपुरके महाकाली अस्पतालमे ८ जाने करके सुदूरपश्चिम प्रदेशभर १ हजार २ सय ६ जाने बिरामी फेला परल संस्था जनैले बा ।
विगतके दिनमे मलेरिया पचाके बैठल आदिवासी जनजाति समुदायमे यी रोग ढेर डेखल बा । कलेसे कहु कहु गैर आदिवासी जनजाति समुदायमे डेखा परल डा. कायस्थ बटैलै ।
