जैविक तथा भौतिक तटबन्धके अनुगमन

पहुरा समाचारदाता
हसलिया, २८ फागुन । कैलारी गाउँपालिका–८ पुथ्वीपुरमे लडिया कटानी नियन्त्रणके लाग निर्माण कैगिल जैविक तथा भौतिक तटबन्धके गाउँपालिका स्तरीय अनुगमन टोलीसे अँटवारके रोज अनुगमन कैगिल बा ।

गाउँपालिका स्तरीय अनुगमन टोलीसे संयोजक तथा कैलारी गाउँपालिकाके उपाध्यक्ष भगवतीकुमारी चौधरीके नेतृत्वमे एक ठो जैविक ओ दुई ठो भौतिक तटबन्धके स्थलगत अनुगमन करल हो । अनुगमन टोलीसे १० लाखमे निर्माण कैगिल जैविक तटबन्धके अनुगमन करले बा । यकर लम्बाई ४२० मिटर रहल बा । ओस्टेक वडा–८ खैरी तोलमे ९ लाख बजेटमे निर्माण कैगिल जैविक तटबन्धकेफे अनुगमन करल बा । यकर लम्बाई ३७० मिटर रहल बा ।

ओस्टेक करके कैलारी–८ कुट्टी तोल झोलुङ पुल लग्गे १० लाख बजेटमे ३९ मिटरमे भौतिक तटबन्ध योजनाके अनुगमन कैगिल योजना शाखा प्रमुख सन्तोषकुमार चौधरी बटैलै ।
लडिया कटानी नियन्त्रणके लाग हुइल भौतिक तटबन्ध, एक ठो जैविक तटबन्ध पूर्णरुपमे सम्पन्न हुइल ओ ९ लाख बजेटवाला एक ठो जैविक तटबन्ध योजना सम्पन्न हुइना अवस्थामे रहल उहाँ बटैलै । गाउँपालिका स्तरीय अनुगमन टोलीसे संयोजक भगवतीकुमारी चौधरी योजनाके काम सन्तोषजनक रहल बटैली ।

अनुगमन टोलीमे अनुगमन टोलीमे योजना शाखा प्रमुख सन्तोषकुमार चौधरी, पूर्वाधार विकास समिति संयोजक तथा वडा नम्बर ६ के अध्यक्ष प्रेमबहादुर चौधरी, वडा नम्बर ८ के अध्यक्ष तारामल कठरिया, प्राविधिक निर्मल चौधरी, टोली सदस्य सुनिला चौधरी, वडा सचिव लगायतके सहभागिता रहल रहे ।