प्राबिधिक शिक्षासे रोजगारीमे जोरना सहजुलः प्रदेश प्रमुख

पहुरा समाचारदाता
धनगढी, ३० फागुन । धनगढी उपमहानगरपालिका–८ मे रहल धनगढी नमूना प्राविधिक माविके ७५औं वार्षिकोत्सव÷हिरक जयन्ती महोत्सव समारोह तथा अभिभावक दिवस मनागिल बा ।

सुदूरपश्चिम प्रदेश प्रमुख देवराज जोशीके वडका पहुनामे हुइल कार्यक्रममे विशिष्ट पहुना धनगढी उपमहानगरपालिकाके उप प्रमुख कन्दकला राना, ऐश्वर्य बहुमुखी क्याम्पसके प्रमुख धर्मदेव भट्ट, वडा नम्बर ८ के वडा अध्यक्ष जुगराम चौधरी रहल रहिट ।

कार्यक्रममके बोल्टी वडका पहुना प्रदेश प्रमुख देवराज जोशी अब्बे प्राविधिक शिक्षाके आवश्यकता रहल बटैलै । उहाँ कहलै, शिक्षाके विकास नइहुके कौनोफे विकास सम्भव नइ हो । समाज परिवर्तनके लाग नागरिकहे शिक्षित बनैना अति आवश्यक रहल प्रदेश प्रमुख जोशी बटैलै । उहाँ विद्या मनैनके सबसे भारी धन रहल फे बटैलै । जे विद्या आर्जन करले रहठ, उ व्यक्ति हरेक ठाउँमे अवसर पाइठ, प्रदेश प्रमुख जोशी कहलै, ‘विद्या विनाके जीवन अन्धकार रहठ ।’ विद्यामे केक्रो अंश नइलग्ना ओ कोईफे अछिने नइसेक्ना कहटी प्रदेश प्रमुख जोशी सक्कु विद्यार्थीहे मन लगाके पह्रना ओ उज्वल भविष्य निर्माणके खाका बनैना अनुरोध करलै ।

पछिल्का समय प्राबिधिक शिक्षाके माग बह्रल ओ प्राबिधिक शिक्षा आर्जन करल विद्यार्थीहे रोजगारीमे जोरना समेत सहज हुइल बटैटी प्रदेश प्रमुख जोशी कहलै, ‘समयके माग अनुसार हम्रे विद्यार्थीहे शिक्षा डेहे सेके परठ, धनगढी नमूना माविसे समयके माग अनुसार अपनेह रुपान्तरण करल पागिल, यैसिक अन्य शैक्षिक संस्थासेफे प्राबिधिक शिक्षामे जोड डेना अपरिहार्य बा ।’

कार्यक्रमके विशिष्ट पहुना धनगढी उपमहानगरपालिकाके उपप्रमुख कन्दकला राना भौतिक विकाससेफे अब्बे शिक्षा, स्वास्थ्य ओ मानव विकास कैना जरुरी रहल बटैली । धनगढी उपमहानगरपालिका डुबान क्षेत्र रहल ओरसे डुबानमुक्त बनैना उपमहानगरहे ढेर बजेटके आवश्यकता रहल बटैली । धनगढी नमूना प्राविधिक माविके अपनेफे पहिले सदस्य रहल कहटी अब्बे ढेर विकास करल बटैली ।

ओस्टेक विशिष्ट पहुना ऐश्वर्य बहुमुखी क्याम्पसके प्रमुख धर्मदेव भट्ट अब्बेक समय प्रविधिमैत्री शिक्षा सिख्ना सिकैना समय रहल बटैलै । समाज परिवर्तनके लाग अभिभावकसे अपन लर्कनसे सुरु करे पर्ना बटैलै । उहाँ कहलै, बालबालिका पहिल पाठशाला घर ओ पहिल शिक्षक डाई बाबा हुइट । ओइने जस्टे संस्कार डिही ओस्टेहे लर्काफे हुइना उहाँ बटैलै । खानाके सट्टा लर्कनहे चाउचाउ, जंङक फुड डेहे ओइनेक स्वास्थ्य विगरल, सुफलाइक लाग मोवाइल पैसा डेहल कारण लर्का विगरटी गैलफे उहाँ बटैलै ।

कार्यक्रममे धनगढी उपमहानगरपालिका–८ के वडा अध्यक्ष जुगराम चौधरी विद्यालयहे धेरवार कैना ओ लग्गेक खोला कटानीसे बचाइक लाग तटबन्धके आवश्यक रहल बटैलै ।

कार्यक्रममे नेपाल शिक्षक संघ कैलालीके अध्यक्ष तथा शारदा माविके प्रअ तेजबहादुर सिंह, उ विद्यालयके पूर्व अध्यक्ष शिवराज राना, उपेन्द्रराज जोशी, नेपाली काँग्रेस धनगढी उपमहानगरपालिका–८ के वडा सभापति मोहन ओझालगायत मन्तव्य करल रहिट । विद्यालयके प्रअ लक्ष्मणदत्त भट्ट विद्यालयके प्रगति ओ अवस्थाबारे जानकारी डेहल रहिट ।

७५औं वार्षिकोत्सव÷हिरक जयन्ती महोत्सव समारोह तथा अभिभावक दिवस कार्यक्रममे अवसरमे उहे विद्यालयके पूर्व विद्यार्थी समेट रहल पूर्व मन्त्री, पूर्व प्रतिनिधिसभा सदस्य नारादमुनी राना, धनगढी उपमहानगरपालिकाके उपप्रमुख कन्दकला, विद्यालयके पूर्व कर्मचारी हरिष चन्द्र चौधरी, सूर्य प्रसाद चौधरीहे सम्मान कैगिल बा ।

ओस्टेक सम्मानित हुइलमे विद्यालयके प्रअ लक्ष्मणदत्त भट्ट, शिक्षक गंगाप्रसाद चौधरी, विद्यालयके शिक्षक÷शिक्षिक योगेश बुढा, मिना जोशी उपाध्याय, निर्मला भट्ट सापकोटा ओ पारु ओझा जोशी रहल बटै । ओस्टेक करके विद्यालयके शैक्षिक गुणस्तरमे टेवा पुगाइकल लाग महायज्ञ संचालन करके सहयोग करुइया शिवराज ओझाफे सम्मानित हुइल बटै ।

विद्यालय व्यवस्थापन समिति अध्यक्ष लक्ष्मीराज जोशीके अध्यक्षतामे हुइल कार्यक्रमके संलालन प्रेमप्रसाद भट्ट करले रहिट । टमान विद्यालयके प्रअ, अभिभावकहुकनके सहभागितामे हुइल कार्यक्रममे बार्षिकोत्सवके अवसरमे हुइल खेलकुडमे सहभागी खेलाडीहुकनके पुरस्कार प्रमाण वितरण कैगिल रहे । कलेसे विद्यार्थीहुकनके नृत्य प्रस्तुत कैगिल रहे ।